Almatyda Álıhan Bókeıhannyń 150 jyldyq merekesiniń sharalary qorytyndylanady
ASTANA. QazAqparat - Jeltoqsannyń 27-i kúni Almatydaǵy QR Ulttyq kitaphanasynda saǵat 11-00-de dóńgelek ústel otyrysy ótip, onda tarıhshylar men ǵalymdar, Álıhan Bókeıhanovtyń 150 jyldyǵyn merekeleýge qatysty atqarylǵan sharalardyń qorytyndysyn shyǵarmaq. Sonymen qatar otyrysta qoǵam qaıratkeriniń ómiri men qyzmetine qatysty qyzyqty faktiler aıtylady.
Dóńgelek ústel otyrysynyń aıasynda Qazaq geografııalyq qoǵamynyń qoldaýymen jaryqqa shyqqan «Álıhan álemi» atty kitaptyń tusaýkeseri ótedi. Kitaptyń avtory qazaqtyń belgili ǵalym-alashtanýshysy Qaıyrbek Kemeńger. Basylymǵa arnalǵan materıaldardyń bir bóligi ǵalym, aǵartýshy, saıasatker Álıhan Bókeıhanovtyń 150 jyldyǵyna arnalǵan ekspedıtsııa barysyna Qazaq geografııalyq qoǵamynyń ókilderi jınady.
Aıta keteıik, ótken jazda elimizge tanymal tarıhshylar, alashtanýshylar Qazaqstan-Reseı-Belarýs baǵyty boıynsha, Qazaq geografııalyq qoǵamy uıymdastyrǵan Álıhan Bókeıhanovtyń muralaryn zertteý ekspedıtsııasyna qatysty. Kitap oqyrmandardy Álıhan Bókeıhannyń ómiri men eńbekteri jónindegi qyzyqty faktilermen tanystyryp, nasıhattaýǵa arnaldy.
Sharaǵa kitaptyń avtory, dotsent, EUÝ-niń ǵylymı qyzmetkeri Qaıyrbek Kemeńger, tarıh ǵylymdarynyń doktory, professor Mámbet Qoıgeldıev, M.O.Áýezov atyndaǵy ádebıet jáne óner ınstıýtynyń bólim meńgerýshisi Aıgúl Іsmaqova, QR Ulttyq bankiniń bas dızaıneri Almat Basenov qatysady.
