Almatyda Álıhan Bókeıhan týraly entsıklopedııa tanystyryldy
Shoqan Ýálıhanov atyndaǵy Tarıh jáne etnologııa ınstıtýty men L.N. Gýmılev atyndaǵy Eýrazııa ulttyq ýnıversıteti, «Alash» ǵylymı-zertteý ınstıtýty bul basylymdy Almaty ákimdiginiń qoldaýymen jaryqqa shyǵardy.
Álıhan Bókeıhannyń shyǵarmalarynyń 15 tomdyǵy 5 myń tırajben basylyp shyqty. Búginde bul kitaptyń birazy Qazaqstan boıynsha kóptegen kitaphanalarǵa, JOO kitaphanalaryna taratyldy.
Álıhan Bókeıhan shyǵarmalarynda ár jyldary qazaq jáne orys tilderinde jaryq kórgen maqalalary, ǵylymı zertteýleri, 1897-1901 jj. Qazaq oblystaryn zerttegen «Şerbına ekspedıtsııasynyń» materıaldary, L.Tolstoı shyǵarmalarynan aýdarǵan áńgimeleri, ótinishteri, hattary jáne hattamalary qamtylǵan.
15 tomdyq jınaqta sondaı-aq Á. Bókeıhannyń baspasóz betterinde jarııalanǵan maqalalary, azanamasy (nekrolog), korrespondentsııalar, jedelhattar, sóılegen sózderi, ádebı syn, folklorlyq zertteý, ashyq hattary, saıası satıralary, áńgimeleri, feletondary bar. Á. Bókeıhan izdep jarııalaǵan arhıv qujattary, monografııalary, hattary, jazbalary, tarıhı-anyqtamalyq ocherkter, estelik, saıası sholý, úndeýleri toptastyrylǵan. Qaıratkerdiń Batys maıdannan bergen hattary, Alashordanyń, Búkilreseılik ýaqytsha úkimettiń zańnamalyq qaýlylary, buıryqtary, hattamalary, basqa da resmı qujattar, Reseı ýaqytsha ókimetiniń komıssary retinde shyǵarǵan buıryqtary men jedelhattary, pikirleri, sonymen qatar maqalalarynyń QR Ulttyq kitaphanasymen birlesip jasalǵan bıblıografııalyq kórsetkishi bar.
«Búgingi shara - tarıhı shara, táýelsizdik jolynda turǵan memleketke laıyqty is shara. Álıhan Bókeıhanov bastaǵan qazaq oqyǵandary, zııalylary ne úshin bulaı jasaǵanyn, ne úshin jazalanǵany, atylǵanyn da jaqsy bilgen. Bilmeýi múmkin emes. Basynda olar sondaı kedergiler bolatynyn bilgen. Kúres jolyna túskenin uqty. Oǵan Álıhannyń artynda qalǵan muralary, eń sońǵy hattamalary kýá bolady. Álıhan halqy úshin qurbandyqqa bardy», - dedi QR UǴA akademıgi, professor, tarıh ǵylymdarynyń doktory Mámbet Qoıgeldi.
«Álıhan Bókeıhan» tulǵalyq entsıklopedııasyna alash qaıratkeriniń ómirbaıandyq derekteri, qaıratkerlik qyzmeti, ǵylymı, pýblıtsıstıkalyq, aýdarma muralary týraly maqalalar engizilgen. Kitapta Alash qozǵalysyna qatysty maǵlumattar, Alash qaıratkerleriniń ómirbaıandary, sondaı-aq ǵalym jóninde jazylǵan eńbekter men olardyń avtorlary týraly da málimetter berildi.
Aıta ketý kerek, Memleket basshysy óziniń «Uly dalanyń 7 qyry» maqalasynda tarıhı tanymdy tereńdetýdiń mańyzdylyǵyn atap ótken bolatyn.
