Almatyda áli de 12 aýmaqta sel qaýpi bar
ALMATY. QazAqparat - Almatyda sońǵy eki jylda sel qaýpi bar 67 aýmaqtyń 55-inde júrgizilgen júıeli jumystyń arqasynda sý tasqyny qaýpi seıildi. Bul týraly qalalyq TJD baspasóz qyzmeti habarlady.
Qalada jyl basynan beri kóktemgi naýqanǵa daıyndyq sharalary júrgizilip keledi. «Qazgıdromet» RMK gıdrometeorologııalyq monıtorıngine sáıkes, Almatydaǵy Úlken jáne Kishi Almaty ózenderi basseıninde 60 sm qar jatyr. Byltyr bul aımaqqa 67 sm qar túsken.
Qazan men qańtar aralyǵynda osy aımaqqa túsken jaýyn-shashyn mólsheri qalypty kórsetkishten 10 paıyzǵa tómen. Qalalyq TJD málimdeýinshe, Úlken jáne Kishi Almaty ózeni basseınine áli de jaýyn-shashyn túsýi yqtımal. Bıik taýlarda qar maýsymǵa deıin jaýýy múmkin. Aqpan aıynda qaladaǵy ortasha temperatýra -3 gradýs shamasynda bolmaq.
2016 jyly bolǵan sý tasqynynyń zardaptaryn eskere otyryp, qalalyq TJD jıi sý basatyn 67 aýmaqty baqylaýǵa alǵan bolatyn. Sońǵy eki jylda sel qaýpiniń aldyn alýǵa ákimdik 12,7 mlrd teńge jumsady. Alataý, Naýryzbaı, Bostandyq, Túrksib aýdandarynyń problemalyq aımaqtarynda 24 shaqyrym aryq jelisi salyndy. Josparly túrde 73 shaqyrym aryq jelisi qaıta qalpyna keltirildi.
Eki jyl ishinde Kishi Almaty, Jarbulaq, Esentaı ózenderindegi 7 kópir jóndeldi. Buǵan 901 mln teńge jumsalsa, sý qorǵaý aımaqtaryn qalpyna keltirýge 30 mln teńge jumsaldy. Osylaısha 2017-2018 jyly júrgizilgen júıeli jumystardyń arqasynda 67 qaýipti aýmaqtyń 55-inde qaýip seıildi.
2019 jyldan bastap qalanyń 5 aýdanynda 49,5 shaqyrym aryq jelisi qaıta jóndeýden ótedi. Seldiń aldyn alý maqsatynda 5019 adamnan turatyn jeke quram jasaqtaldy, 1375 tehnıka, 3 júzý quraly, 82 motopompa, 83 avtonomdy elektrostansa daıyndaldy. Azamattyq qorǵanys maqsatynda 10000 qapshyq, 714 tonna qum, 10 tonna balshyq, 35 tonna dızel otyny, 30 tonna benzın ázirlendi.
Almaty ákimdigi rezervinde tótenshe jaǵdaılardy boldyrmaý maqsatynda 5 mlrd teńge qarastyrylǵan.
