Almatyda Alǵys aıtý kúninde týylǵan nárestelerge syılyq berildi
ALMATY. QazAqparat - Almatyda Alǵys aıtý kúninde týylǵan nárestelerge syılyq berildi. Atalǵan merekelik is-sharany «Qoǵamdyq kelisim» mekemesi, QHA Almaty qalalyq bólimi uıymdastyrdy.
Búgin №1 qalalyq perzenthanada 6 náreste dúnıege keldi. Jas bosanǵan analarǵa QHA Almaty qalalyq bóliminiń hatshylyq meńgerýshisi Margarıta Abdalıeva QHA tarıhy jazylǵan estelik kitaptardy syıǵa tartty.
«Búgin Elbasy Jarlyǵymen Alǵys aıtý kúni dep jarııalandy. Bul merekeniń ıdeıalyq maǵynasy QHA qyzmetimen, ıdeıasymen mazmundas keledi. Bul kúni biz qanshama adamǵa pana bolǵan qazaq eline, jerine alǵysymyzdy bildiremiz. Halyqtar birliginiń arqasynda elimizde analarymyz dúnıege sábı ákelip jatyr. Osy ýaqyt aralyǵynda 6 náreste dúnıege keldi. Olardyń barlyǵyna perzenthana atynan jańa kıim, arnaıy sómke, jeke gıgıena zattary berildi», - dedi bas dárigerdiń emdeý isi boıynsha orynbasary Záýre Dathaeva.
Aıta keteıik, Qazaqstan Respýblıkasynyń Prezıdenti Nursultan Nazarbaevtyń 2016 jylǵy 14 qańtardaǵy Jarlyǵymen Qazaqstanda Alǵys aıtý kúni bekitildi.
1995 jyldyń 1 naýryzynda elimizde Qazaqstan halqy Assambleıasy quryldy jáne 2015 jyly Assambleıanyń jıyrma jyldyǵyn merekeleý aıasynda Memleket basshysy bul kúndi halyqtardyń bir-birine jáne qazaqtarǵa kóptegen halyqtar elge kúshtep qonystandyrylǵan kezde tózimdilik pen qonaqjaılylyq tanytqany úshin alǵys bildire alatyn kún dep jarııalaýdy usyndy.
Elimizde 130-dan astam ult pen ulys ókilderi bir úıdiń balasyndaı ǵumyr keshýde. Qazaqstan - azamattyq kelisimdi, túrli mádenıetter pen dinderdi toǵystyrǵan kópultty, zaıyrly memleket.
