Almatyda Alǵys aıtý kúni atap ótildi
Jıynǵa Almaty qalasy ákiminiń orynbasary Erjan Babaqumarov, Almaty qalasy boıynsha Qazaqstan halqy Assambleıasy hatshylyǵynyń meńgerýshisi Nazar Balǵymbaev, «Qoǵamdyq kelisim» qalalyq fılıalynyń dırektory Sh. Tájmuratov jáne etnomádenı birlestikterdiń ókilderi qatysty.
Dóńgelek ústel qatysýshylary etnosaralyq qatynastar salasyndaǵy memlekettik jáne azamattyq qoǵam ınstıtýttarynyń is-qımylyn, sondaı-aq etnosaralyq kelisimdi, qoǵamdaǵy toleranttylyq pen halyq birligin odan ári nyǵaıtý úshin qolaıly jaǵdaı jasaý máseleleri jaıynda ózara pikir almasty.
Almaty qalasy ákiminiń orynbasary Erjan Babaqumarov alǵys aıtý kúni halyqtar dostyǵy men yntymaq, birlikke bastaǵan Qazaqstan halqy Assambleıasynyń qurylýyna yqpal etkenin atap ótti. Búginde Almatyda 100-den astam ult ókili turady. 37 qalalyq jáne 19 respýblıkalyq etnomádenı birlestik jumys isteıdi. 2019 jyly Almatynyń etnomádenı birlestikteri Assambleıanyń qoldaýymen 182 qaıyrymdylyq sharasyn ótkizdi. 8 310-den asa muqtaj azamatqa kómek berip, 870 otbasyǵa qoldaý kórsetti.
Óz kezeginde etnomádenı birlestikterdiń ókilderi qazaq jerine alǵysyn bildirip, etnosaralyq dostyq sabaqtastyǵyn saqtaýdyń mańyzdylyǵyn atap ótti.
«Alǵys aıtý kúni – barsha halyqty biriktiretin mereke. Bul kúni ár adam qasyndaǵy jandarǵa: «Bizdiń qoı ústine boztorǵaı jumyrtqalaǵan, mamyrajaı elde turyp jatqanymyz úshin myń da bir alǵys» dep aıtýy tıis. Bul meıram, eń aldymen, óskeleń urpaqqa qajet. Alǵys aıtý kúninde balalarymyzǵa Otanymyzdy saqtap qalǵanymyzdy aıtyp, 130 ult ókiliniń bir baıraqtyń astynda bir-birimen tatý-tátti ómir súrip jatqanyn eskertýimiz artyq emes», – dedi «Qazaqstandaǵy Orys mádenı ortalyǵynyń» tóraǵasy Vsevolod Lýkashev.
«Barbang» kúrdter qaýymdastyǵynyń tóraǵasy Knıaz Mırzoevtiń aıtýynsha, kóktemniń alǵashqy kúni «rahmet» sózimen bastalady. Ol sovet úkimeti jyldarynda uly dalaǵa qonys aýdarǵan halyqtar bir-birine shydamdylyq pen qonaqjaılyq úshin alǵys bildire alatynyn, bul dástúr el birligi men yntymaqtastyǵyn odan ári nyǵaıta túsetinin jetkizdi.
«Qazaqstan – kópultty memleket. Bul merekede túr-túsimizge, dinı senimimizge qaramastan, bir-birimizge Qazaqstanda tatý-tátti otbasy bolyp ómir súrip jatqanymyz úshin alǵys aıtýymyz tıis. Bul dostyqtyń kirpishin qıyn-qystaý zamanda ómir súrgen ákelerimiz ben atalarymyz qalaǵan. Meniń oıymsha, endi biz, etnomádenı birlestikterdiń basshylary, aǵa urpaq ózderiniń balalaryna, nemerelerine Qazaqstan dostyqtyń pen eńbektiń arqasynda boı kótergenin jetkizýimiz kerek», – dedi Qazaqstannyń grek qoǵamdary qaýymdastyǵynyń prezıdenti Georgıı Iordanıdı.
Bıyl qazaqstandyqtar Alǵys aıtý kúnin besinshi ret atap ótýde. Bul merekege QR Tuńǵysh Prezıdenti - Elbasy 2016 jyly bastamashylyq etken bolatyn. Bul kún barlyq qazaqstandyqtardyń bir-birine degen meıirimdiligi men dostyǵynyń jáne súıispenshiliginiń jarqyn merekesine aınalmaq.
