Almatyda alǵashqy jartyjyldyqtaǵy ınvestıtsııanyń kólemi 174,5 mlrd. teńgeni qurady
ALMATY. 16 shilde. QazAqparat - Almatyda alǵashqy jartyjyldyqta ekinshi deńgeıli bankter 1 729,0 mlrd. teńgeniń nesıesin bergen,
bul ótken jyldyń sáıkes kezeńimen salystyrǵanda 14,3 paıyzǵa joǵary.
Bul týraly keshe qala ákimi Ahmetjan Esimovtiń tóraǵalyq etýimen bolǵan Almatynyń 2013 jyldyń birinshi jartyjyldyǵynyń áleýmettik-ekonomıkalyq damýynyń qorytyndylaryna arnalǵan alqaly jıynda aıtyldy. Jyl basynan beri qaraı shaharda 302,7 mlrd. teńgeniń ónerkásiptik ónimderi shyǵarylǵan. Bul ótken jyldyń osy kezeńimen salystyrǵanda 1,1 paıyzǵa artyq. Al bólshek saýda aınalymy - 20,9 paıyzǵa, kóterme saýda aınalymy 7,3 paıyzǵa artqan. Syrtqy saýda aınalymy bolsa qańtar-mamyr aılarynda 6,9 mlrd. dollardy quraǵan, bul 2012 jyldyń sáıkes kezeńimen salystyrǵanda 4,8 paıyzǵa joǵary. Qalada júk aınalymy - 6,6 paıyz; jolaýshy tasymaldaý aınalymy 11,6 paıyz bolǵan. Baılanystan túsken kiris 177,4 mlrd. teńgeni qurap, 21,5 paıyzǵa ósip otyr. Sondaı-aq, alty aıdyń ishinde 479,8 myń sharshy metr turǵyn úı salynǵan. Turǵyn úı qurylysyndaǵy ósim ótken jylmen salystyrǵanda 1,8 paıyzdy qurap otyr.
