Almatyda alǵashqy jartyjyldyqta 205 mıllıard teńgeniń ónerkásip ónimderi óndirildi
ALMATY. 26 shilde. QazAqparat /Erlik Erjanuly/ - Almatyda alǵashqy jartyjyldyqta ótken jyldyń sáıkes kezeńimen salystyrǵanda ónerkásip ónimderin óndirý 21,4 paıyzǵa ulǵaıdy. Bul búgin qalalyq ákimdikte ótken 1-shi jartyjyldyqtaǵy áleýmettik-ekonomıkalyq damýynyń qorytyndylaryna arnalǵan alqaly jıynda aıtyldy.
«Jyl basynan beri 205 mıllıard teńgeniń ónerkásip ónimderi óndirildi. 41 paıyzdyq aıtarlyqtaı joǵary ósim elektr energııasyn óndirý men bólý, gaz jáne áýe shartyna sáıkestendirýde tirkeldi», - deıdi Ekonomıka jáne bıýdjettik josparlaý basqarmasynyń batyǵy Sardar Qabdýlov.
Onyń aıtýynsha, óńdeý salasyndaǵy ósim 20 paıyzdy qurap otyr. Ol negizinen tamaq, kıim jáne tigin ónimderi esebinen ulǵaıdy. Jalpy álemdik qarjylyq-ekonomıkalyq daǵdarystan keıin qalanyń áleýmettik ekonomıkalyq damýyndaǵy 2010 jyldyń aıaq sheninde baıqalǵan oń ózgerister aǵymdaǵy jartyjyldyqta óz jalǵasyn tapty. Alǵashqy toqsannyń qorytyndysyna qaraǵanda bul úrdis ornyqty sıpat ala bastady. Negizgi kapıtaldaǵy ınvestıtsııanyń kólemi 6 aıda 160,9 mıllıard teńgeni qurady. Bul ótken jyldyń sáıkes merzimimen salystyrǵanda 2,4 paıyzǵa joǵary. Іskerlik belsendiliktiń ósýi men tutynýshylyq suranystyń qalpyna kelýin kóterme jáne bólshek taýar aınalymynyń 23 jáne 7 paıyzǵa deıin artýynan da baıqaýǵa bolady.
