Almatyda alǵashqy toqsanda jumyssyzdyqtyń deńgeıi 0,3 paıyzdy qurady - Ahmetjan Esimov
ATY. 12 mamyr. QazAqparat /Erlik Erjanuly/ - Almatyda 2001 jyldyń alǵashqy toqsanynda qala tarıhyndaǵy eń tómengi jumyssyzdyq deńgeıi tirkeldi.
Qala ákimi Ahmetjan Esimov búgin Almatyda QR Prezıdenti Nursultan Nazarbaevtyń qatysýymyn ótken alqaly jıynda osylaı aıtty.
«Sizdiń qatysýyńyzben Almaty qalasynyń áleýmettik-ekonomıkalyq damýyna arnalǵan mundaı jıyn budan 2 jyl buryn ótken bolatyn. Onda berilgen barlyq tapsyrmalaryńyz túgel oryndalyp, bólingen qarjy tolyq ıgerildi. Alǵashqy toqsanda ónerkásip óndirisi 27 paıyzdan astamǵa ósti. Negizgi kapıtaldaǵy ınvestıtsııa kólemi de 21 paıyzǵa ulǵaıdy. Turǵyn úıdi paıdalanýǵa berý kólemi de 10 paıyzǵa artty. Ekinshi deńgeıli bankterdiń nesıe berýi 41 paıyzǵa ósip, 600 mılıard teńgeden asty», - dedi Ahmetjan Smaǵululy Memleket basshysyna qaratyp aıtqan sózinde.
Qala basshysynyń aıtýynsha, alǵashqy toqsanda Almatyda ınflıatsııa deńgeıi 3,5 paıyzdy qurady. Inflıatsııa deńgeıin ustap turýda birqatar sharalar júrgizilgen edi. Atap aıtqanda Almaty, Jambyl, Ońtústik Qazaqstan oblystarymen turaqty túrde azyq-túlik jármeńkesin uıymdastyrý týraly memorandýmdar jasaldy. Sondaı-aq aýyl sharýashylyǵyn taýarlaryn jetkizý jóninde kórshiles Qyrǵyzstan men Ózbekstan elderimen de kelisimder jasaldy.
«Jumyspen qamtý ortalyǵyna alǵashqy toqsanda 2300 adam habarlasty. Bul ótken jylmen salystyrǵanda 2 ese az. Ekonomıkalyq belsendi halyqqa shaqqanda tirkelgen jumyssyzdyq kólemi 0,3 paıyz. Bul búkil qala tarıhyndaǵy eń tómengi kórsetkish», - deıdi A. Esimov.
