Almatyda alǵashqy toqsanda negizgi kapıtaldaǵy ınvestıtsııa kólemi 67 mıllıard teńgeni qurady - Asqar Nesipbaev
ALMATY. 8 maýsym. QazAqparat /Erlik Erjanuly/ - Almatyda alǵashqy toqsanda negizgi kapıtaldaǵy ınvestıtsııa kóleminiń ósimi 121,3 paıyzdy qurady.
Bul búgin Almatyda ótip jatqan І «Qazaqstandaǵy memlekettik-jeke seriktestik» dep atalatyn konferentsııada aıtyldy.
"Almaty kez-kelgen halyqaralyq ólshem boıynsha óte tartymdy qala. Onyń damý keleshegi ulttyq qana emes, halyqaralyq aıada da óte zor. Oǵan negizgi kapıtaldaǵy ınvestıtsııalyq belsendiliginiń ósimi aıqyn dálel bola alady. Bul alǵashqy toqsannyń qorytyndysynda 67 mıllıard teńgeni nemese 121,3 paıyzdy qurady. Qarjy kóziniń teń jartysy kásiporyndardyń óz qarajaty. Sondaı-aq ınvestıtsııa qurylymda aıtarlyqtaı ózgeris bar. Máselen Zaemdyq quraldardyń úlesi 2010 jylǵy 10 paıyzdan bıyl 22 paıyzǵa ulǵaıyp otyr", - deıdi "Almaty qalasynynyń damý ortalyǵy" AQ-nyń atqarýshy dırektory Asqar Nesipbaev.
Onyń aıtýynsha, bıýdjettik qarjy 26,7 paıyz bolsa, sheteldik ınvestıtsııanyń úlesi 4,5 paıyzdy quraýda. Qalany damytý maqsatynda ınfraqurylymdar men jańa óndiristerge ınvestıtsııa tartýda ákimshilik Qazaqstan Respýblıkasynyń zańnamasynda ruqsat etilgen qarjy quraldarynyń bárin paıdalanýda. Bul - jergilikti atqarýshy organnyń oblıgatsııasyn shyǵarý, tikeleı ınvestıtsııa tartý, halyqaralyq qarjy ınstıtýttarymen yntymaqtasý, memlekettik kepildik jáne taǵy basqalar. Sondaı-aq ınvestıtsııa tartýdaǵy sharalardyń biri memlekettik-jeke áriptestik tetikteri bolyp otyr. Bıýdjet qarjysynyń shekteýligi jaǵdaıynda ınvestıtsııalyq jobalardy júzege asyrýda qajetti quraldy memlekettik-jeke seriktestik aıasynda tartý iskerlik belsendilikti jandandyrýǵa oń yqpalyn tıgizedi.
