Almatyda alǵashqy fızıka-matematıkalyq baǵyttaǵy Nazarbaev zııatkerlik mektebi ashyldy

Oqý ordasynyń saltanatty ashylý rásimine qala basshysy Ahmetjan Esimov, qalalyq Bilim basqarmasynyń basshylyǵy, «Órken» bilim grantynyń ıegeri atanǵan mektep oqýshylary, olardyń ata-analary, sondaı-aq óńirdegi ǵylymı-pedagog qyzmetkerler qatysty.

«HHІ ǵasyr - ǵylym keńistigindegi báseke ǵasyry ekendigi ras. «Bilimdi myńdy jyǵady» degen halyq danalyǵyn dáleldeıtin ýaqyt keldi. Ol úshin memleket tarapynan sizderdiń bilim alýlaryńyzǵa barlyq jaǵdaı jasalǵan. Respýblıka kóleminde zamanaýı quraldarmen jabdyqtalǵan Nazarbaev zııatkerlik mektepteri kóptep ashylýda. Memleket tehnıkalyq salany meńgerýge beıimi bar daryndy balalarǵa biregeı múmkindik berip otyr. Olar álemdik jáne qazaqstandyq úzdik oqý baǵdarlamalary boıynsha bilim alady. Bıylǵy jyldyń Almatyda bilim jyly bolyp jarııalanǵanyn ózderińiz de bilesizder,. Sonymen qatar, jańa mektep Astana kúni qarsańynda boı kóterip otyr. Men sizderdiń bilikti azamat bolyp shyǵatyndaryńyzǵa senemin», - dedi qala basshysy Ahmetjan Esimov óz sózinde.

Ashylý saltanatynan keıin balalarǵa fızıka, hımııa, robot tehnıkasy, oqý telestýdııasy, oranjereıa, kitaphana, akt zaly jáne basqalardy kórsetý josparlanǵan kampýs-týr uıymdastyryldy.

Atap aıtqanda, oqýshylar Hohenloher ınnovatsııalyq oqý jabdyǵymen tanysty. Zerthananyń atqarymdylyǵy men keńdigi klassıkalyq sabaqtar men dáristerdi de, komandalyq tájirıbelik sabaqtardy da ótkizýge múmkindik beredi. «Nawis» ilme kommýnıkatsııalyq júıesi gazben, elektr qýatymen, sýmen, jaryqpen jáne ınternetke qosýdy qamtamasyz etedi.

«Orynjaıdaǵy jıhaz edenge bekitilip ornalastyrylmaǵan, ótkiziletin sabaqtyń nysanyna baılanysty jeke-jeke basqa oryndarǵa aýystyrylady. Bul oqylyp jatqan materıaldy meńgerýde kórnekilik pen tıimdilikke qol jetkizedi», - dedi «Nazarbaev zııatkerlik mektepteri» DBBU baspasóz hatshysy Áıgerim Qalı.

Atalǵan bilim ordasyna qabyldanýǵa 7052 oqýshy ynta bildirgen. Baıqaý barysynda bir orynǵa 9 úmitkerden keldi. Olardyń ishinde 672 oqýshy top jaryp, «Órken» bilim grantyna ıe boldy.

Jańa oqý jylynda taǵy da 96 bala 7 synypqa qabyldanatyn bolady. Konkýrstyq irikteý 20-21 maýsymda Cito pedagogıkalyq ólshemder ınstıtýty jáne CTY Djons Hopkıns ýnıversıtetiniń Daryndy jastar ortalyǵymen birlese otyryp ótkizilgen.

Tek qana oqýshylar ǵana emes, ustazdar da irikteýden ótti. 2014-2015 oqý jylynda ótinish bergen 518 úmitkerdiń arasynda 157 muǵalim jumysqa qabyldandy.

Jańa mektep 864 orynǵa eseptelgen. Mekteptegi 75 oqý synybynyń ishinde matematıka, ıntegratsııa, tehnıkalyq modeldeý kabınetteri, nano, bıotehnologııalar, robot tehnıkasy, fızıka, hımııa, bıologııa zerthanalary, sondaı-aq jeke sabaq berý jáne psıhologııa kabınetteri bar.

Sport korpýsynda úlken jáne kishi zal, jattyǵý zaly kózdelgen. Úlken sport zaly basketbol jáne voleıbol oınaý úshin alańmen, órmeleý qabyrǵasymen jabdyqtalsa, kishi zalda gımnastıka quraldary ornalastyrylǵan. Mektep aýlasynda jasandy gazony bar fýtbol alańy, túrli alańdar, tennıs korty, balalardyń demalys oryndary salynǵan.

Aqparat blogy medıatekasy men 260 oryndyq oqyrman zaly bar kitaphanadan, 50 myń kitaby bar kitap qoımasynan turady. Radıotehnıka, dekoratsııasy bar akt zaly 480 adamǵa shaqtalǵan. Mektepte 100 oryndyq dáris zaly men 50 orynǵa arnalǵan konferents-zaly, 300 oryndyq ashana jumys isteıtin bolady.

Almaty ákiminiń aıtýynsha, qalada kelesi jyly taǵy bir Nazarbaev zııatkerlik mektebi boı kótermek. Hımııa-bıologııa salasyna mamandandyrylǵan jańa mektep ǵımaraty Qalqaman aýdanynda salynýda.