Almatyda alǵashqy balalar hospısi ashyldy
ALMATY. 25 mamyr. QazAqparat /Názıra Eleýhan/ - Búgin Almatyda onkologııalyq aýrýlarmen aýyratyn balalarǵa arnalǵan alǵashqy hospıs ashyldy.
"Balalar hospısi ashylýynyń negizgi maqsaty - áli eshnárseni kórip te, sezip te, bilip te úırenbegen, ómirge kelgennen osyndaı qaterli aýrýǵa (isikke) shaldyqqan balalardyń hálin sál de bolsa jaqsartý, balaǵa jáne olardyń ata-anasyna medıtsınalyq, psıhologııalyq kómek berý bolyp tabylady",-dedi "Salamatty Azııa" qoǵamdyq qorynyń prezıdenti Naǵıma Plohıh.
Onyń aıtýynsha, hospıstegi balalar tegin emdeledi. "Munda bir mezgilde 9 naýqas qabyldanyp, emdele alady jáne olar úsh apta boıy jatady. Sonymen qatar basqalarǵa arnaıy daıyndalǵan brıgada úıine baryp ta kómek kórsetetin bolady. Negizgi emdelýshiler - daýasy joq onkologııalyq aýrýlarmen aýyratyn balalar. Hospıs shetelderdegi sııaqty, tek janashyr adamdardyń jınaǵan, bergen qarajatyna ǵana ómir súrmek, ıaǵnı ol qarajat kómek 75 paıyzdy qurasa, al qalǵan qarajattyń - 25 paıyzyn Almaty densaýlyq basqarmasy beretin bolady. Oǵan hospıstiń qyzmetkerlerine qarajat, dáriler alynady jáne basqa kommýnaldyq tólemder tólenedi. Qazir qordyń aldynda úlken mindet tur. Hospıske qajetti jıhaz, medıtsınalyq tósekter, eki jedel járdem mashınasyn, balalarǵa kerekti oıynshyqtar men taǵy da basqa kerekti jabyqtardy alýymyz qajet. Ashylatyn hospıstiń aýlasyna oıyn alańyn jasap, hospıstiń ishindegi bólmelerin ertegi keıipkerleriniń sýretterimen kórkemdep, balalarǵa meılinshe, úıdegi jaǵdaıdy jasaý maqsaty tur",-dedi N. Plohıh.
Onyń aıtýynsha, jylyna elimizde 500 ge jýyq bala qaterli isik aýrýlaryna shaldyǵady. "Búgingi tańda 7000- daı bala osyndaı aýrýlarmen esepte tur. Almaty qalasynyń ózinde 27 bala tirkelgen. Qaterli isikpen aýyrǵan balalardyń 60-70 paıyzy aýrýdyń úshinshi-tórtinshi ósý satysynda anyqtalady, bul ýaqyt isiktiń denege jaıylyp, tarap, onymen kúresýge medıtsınanyń kúshi kelmeıtin kez. Mundaı naýqastarǵa qaraý ata- anaǵa túsetin úlken aýyrtpalyq ekeni aıtpasa da túsinikti ",-deıdi ol.
Bul mekeme elimizdegi alǵashqy ilki joba retinde ashylyp otyr. Keıin respýblıkamyzdyń basqa qalalarynda da ashylady dep josparlanýda.
Atalmysh emdeý oryny "Salamatty Azııa" qoǵamdyq qorynyń prezıdenti Naǵıma Plohıhtiń uıymdastyrýymen ashyldy. Almaty ákimdigi ǵımarat bólip, onyń jóndeý jumystaryn júrgizgen. Munda qyzmet etetin dárigerlerge shet elden kelgen pallıatıvtik kómek berý isiniń mamandary dáris oqyp, sheberlik synyptar ótkizetin bolady.
