Almatyda alǵash ret polımerlerdi paıdalana otyryp, asfalt tóseý jumystary júrgizilip jatyr
Almaty ákimdiginiń málimetinshe, Abaı dańǵylyndaǵy jol jumystary kezeń-kezeńimen júrgizilýde. Qazirgi ýaqytta batys baǵytta Dostyq dańǵylynan Naýryzbaı batyr kóshesine deıin, shyǵys baǵytta Tilendıev kóshesinen Áýezov kóshesine deıingi ýchaskelerde jóndeý jumystary tolyq aıaqtaldy. Onda kólik quraldarynyń qozǵalysy tolyq kólemde qalpyna keltirildi.
«Jumys Baıtursynuly kóshesinen Esentaı ózeni arqyly ótetin kópirge deıingi ýchaskede bastalady. Jol qozǵalysyna qatysýshylardyń qaýipsizdigin qamtamasyz etý úshin 17 shilde, saǵat 23-00-den 19 shilde, saǵat 06-00-ge deıin dańǵyldyń soltústik jaǵymen tolyq jabylatyn polımerli asfaltbeton tóseý jumystary júrgiziletin bolady.
Jabyq ýchaskeni aınalyp ótý Shevchenko kóshesi, Qurmanǵazy kóshesi, Baıtursynuly kóshesi, Sátbaev kóshesi arqyly júzege asyrylady. Baıtursynuly kóshesi boıynsha kóliktiń ótpeli qozǵalysy qoljetimdi bolady», - dep habarlady ákimdikte.
Sondaı-aq, Shagabýtdınov kóshesinen ońtústik baǵytta Abaı dańǵylyna ótý jáne Sháripov kóshesine Abaı dańǵylynan soltústik baǵytta ótý 17 shilde saǵat 23-00-den 19 shilde saǵat 06-00-ge deıin shekteledi. Jol-kólik oqıǵalaryn boldyrmaý jáne jol qozǵalysyn uıymdastyrý úshin joǵaryda atalǵan kóshe ýchaskesinde patrýldik polıtsııa polkiniń 3 ekıpajy jumyldyrylatyn bolady.
Jóndeý jumystaryn júrgizý ýchaskeleri týraly ózekti aqparat qala ákimdigi men qalalyq mobıldilik basqarmasynyń resmı betterinde, sondaı-aq GAJ 2-qosymshasynda (geografııalyq aqparattyq júıe) qoljetimdi bolady.
«Eske salsaq, Almatyda alǵash ret quramdaǵy polımerlerdi paıdalana otyryp, asfalt tóseý jumystary júrgizilýde. Mundaı qospalar tozýǵa tózimdi, jumsartý temperatýrasy joǵary (65-70°C), sondyqtan ystyqqa ońaı tótep bere alady, áldeqaıda uzaǵyraq qyzmet etedi. Jóndeý 2023 jylǵa josparlanǵan jumystar aıasynda júrgizilýde. Ýaqytsha qolaısyzdyqtar úshin keshirim suraımyz. Bul qalanyń joldary bizge uzaǵyraq qyzmet etýi úshin qajetti shara. Marshrýtty aldyn ala túzetýdi suraımyz», - dep habarlady Almaty ákimdigi.