Almatyda alǵash ret Oleg Menshıkovtyń teatrlyq seriktestiginiń qaıyrymdylyq qoıylymdary bastaldy
MATY. 13 qazan. QazAqparat /Erlik Erjanuly/ - Búgin Almatydaǵy Natalııa Sats atyndaǵy jastar men balalar teatrynda Oleg Menshıkovtyń «814 teatr seriktestiginiń» «Oıynshylar» dep atalatyn qoıylymy kórsetilýde.
Bul sharany Qazkommertsbank pen «Qus joly» qaıyrymdylyq qory uıymdastyrǵan bolatyn. Erteń olar endi «1990-shy» degen qoıylymdy oınamaq. Odan túsken qarajat tsereberaldy sal aýrýymen aýyratyn balalarǵa arnalǵan Qazaqstannyń 20 qalasyndaǵy saýyqtyrý ortalyqtaryn jabdyqtaýǵa jumsalady.
«Almatynyń atmosferasy men kórermenderi erekshe. Teatrlyq qoıylymdardan birinshi bop «1900-shy» ispettes qıyn monospektakldi alyp keldik. Bizdiń qoıylymdarymyzdyń qaıyrymdylyq sıpat alǵany qýantady. Shyǵarmashylyǵymyz kórermenderimizdi qýantyp qana qoımaı, aýrý balalarǵa óz paıdasyn tıgizetinin bilý, bizge eki ese qýanysh syılaıdy», - deıdi Oleg Menshıkov.
Jalpy «Qus joly» qaıyrymdylyq qory jyl saıyn ótetin «Dáriger Aıaz ata» aktsııasyna bıyl shamamen 15 mıllıon teńge aýdarýdy josparlap otyr. Bul somanyń bir bóligi Almatyda 13-15 qazanda ótetin «Oıynshylar» jáne «1900-shy» qoıylymdaryna satylǵan bıletterden túsedi. Al qalǵan bóligi tsereberaldy sal aýrýymen aýyratyn balalarǵa arnalǵan saýyqtyrý ortalyqtaryn bulshyq et pen dene býyndaryn damytatyn arnaıy jattyǵý quraldarymen jabdyqtaýǵa jumsalmaq.
