Almatyda alǵash ret eki alańda ótetin Naýryz merekesinde 700 ártis óner kórsetedi
Almaty qalasy ákiminiń baspasóz qyzmetiniń habarlaýynsha, «Uly dalanyń Naýryzy» merekelik sharasyna 700-den astam ártis qatysady, olardyń arasynda shyǵarmashylyq ujymdar, aǵash aıaqtar (hodýlıs), dástúrli teatr akterleri, solıster, bı toptary bar. Bulardan ózge buqaralyq «Kórisý» bı flesh-moby da ótedi.
Kontsertterge «ıAlla» toby, Aıqyn Tólepbergen, Móldir Áýelbekova, Álı Oqapov, Álisher Karımov, Marjan Arapbaeva, Indıra Edilbaeva, «MýzART», «Aıýmı», «Voice» toptary, Ramazan Stamǵazıev, Jasulan Saqaev, Nurjan Janpeıisov, Erkin Shúkimánov, «Sazgen Sazy» folklorlyq- etnografııalyq ansambli, Aıgúl Qosanova,«Qońyr» toby, «BAHYT KIDS» balalar hory, «Otyrar sazy» folklorlyq -etnografııalyq ansambli, «Alashuly» toby, «Jorǵa» bı toby, «Týǵan jer» bı ujymy, «Alan» toby, Málıka Esmuhanbetova, «MýzART laıf» toby jáne basqalary qatysady.
Astana alańyna kıiz úıler, ár túrli qostar, shatyrlar tigilip, Naýryz taqyrybyna oraı jasalǵan ınstallıatsııalar ornatylady. Merekede «Múshel» atty teatrlandyrylǵan kórinis kórsetilip, qazaqtyń kóneden kele jatqan « Samalyq», «Túlik jyry» atty salt-dástúrli, rıtýaldy án-jyrlary oryndalady.
Al, Atletter aýylyndaǵy merekelik qoıylym ótetin alań tutastaı jańa qonystanǵan qazaq aýylyn elestetedi. Alańnyń kireberisine ejelgi úlgidegi qaqpa ornatylyp, onyń eki jaq shetine kóne kúıme ústine tigilgen 2 kıiz úı qoıylady.
«Nomad» kaskaderlar toby «Jigitter», «Qyz qýý», «Aýdaryspaq», «semserlesý» kórinisteri arqyly óz ónerlerin kórsetedi. Baǵdarlamaǵa «Qoı kóterý», «Láńgi tebý», «Arqan tartý» sııaqty sheberlik pen eptilikti pash etetin qazaq ulttyq oıyndary da engizilgen.
Eki merekelik alańda da mýzyka aspaptarynyń, búrkit pen tazynyń kórmesin jáne darshylary (kerilgen arqan ústinde júretinder) men aǵash aıaqtardyń ónerin kórsetý de josparlanǵan.
«Naýryz» merekesi barysynda baýyrsaq pen «Naýryz kóje» tegin beriledi.
Mereke sońy keshki baǵdarlama men otshashýǵa ulasady.
