Almatyda áleýmettik shıelenisterdi qarastyrý men sheshý jónindegi qoǵamdyq keńestiń otyrysy ótip jatyr
ALMATY. 27 qańtar. QazAqparat /Erlik Erjanuly/ - Búgin Almatyda áleýmettik shıelenisterdi qarastyrý men sheshý jónindegi qoǵamdyq keńestiń aǵymdaǵy jylǵy alǵashqy otyrysy ótti.
Onda Qoǵamdyń keńestiń Alataý aýdanyndaǵy jer telimderin zańdastyrý máselesi jónindegi 2010 jylǵy 6 mamyryndaǵy sheshiminiń oryndalýy qaraldy.
«Búginde óz betimen jer basyp alý áreketteri tolyǵymen toqtatyldy. Arnaıy júrgizilgen túgendeý kezinde aýdan boıynsha 4523 zańsyz jer telimderi basyp alynǵany anyqtaldy. Qazirgi kezde olardyń 3590-y boıynsha zańdastyrý jóninde sheshimder shyǵarylyp, memlekettik aktileri tabys etildi. Zańdastyrýǵa jatpaıtyn túrli qorǵaý aýmaqtarynda ornalasqan 1200-ge jýyq jer telimderi de qala basshylyǵynyń qoldaýymen óz sheshimin tabýda. Búgingi tańda atalmysh jer telimderinde ornalasqan turǵyndarǵa qaýipsiz aımaqtardan turǵyn úı salyp berý máselesi boıynsha ınvestorlarmen kelissózder júrgizilýde», - deıdi aýdan ákimi Baǵdat Mánizorov.
Onyń aıtýynsha, aýdanda sondaı-aq, irgetasy ǵana ornalasqan 384 jer telimi anyqtalyp otyr. Onyń 22-si sý qorǵaý aýmaǵynda, 4-ýi gaz qorǵaý aýmaǵynda, 6-sy «Krona plıýs» JShS-i jerinde. Al 28-i Borashevtiń sharýa qojalyǵynyń jerinde, 9-y zırattardyń sanıtarlyq aýmaǵynda, 115-i ózge jerlerde ornalasqan.
