Almatyda áleýmettik mańyzy bar taýardyń baǵasy baqylaýda

ALMATY. QazAqparat - Almatyda áleýmettik mańyzy bar taýarlardyń baǵasy qalalyq kásipkerlik jáne ınvestıtsııalar basqarmasynyń erekshe baqylaýynda. Bul týraly atalǵan basqarma basshasy Erkebulan Orazalın málim etti, dep habarlaıdy QazAqparat tilshisi.

«Bar kúshimizdi qalanyń azyq-túlik qaýipsizdigin qamtamasyz etýge jáne áleýmettik mańyzy bar taýarlardyń baǵasyn ustap turýǵa jumsap jatyrmyz. Qazirgi ýaqytta Almatyda óndirýshilerde daıyn ónim men shıkizattyń jetkilikti kólemi bar. Bul qordy kún saıyn el óńirlerinen fermerler men taýar óndirýshiler ákelip tolyqtyryp jatyr. Sondyqtan áleýmettik mańyzy bar azyq-túlik taýarlarynyń tapshylyǵy boljanbaıdy», - dedi basqarma basshysy.

Sonymen qatar Túrkistan oblysynyń óndirýshilerimen erte pisetin qyryqqabatty qalaǵa jetkizý boıynsha kelisim sharttarǵa qol qoıylǵan.

«Mamyrdan bastap tamyz aıynyń sońyna deıin 7 myń tonnadan astam kartop, pııaz jáne sábiz jetkiziledi. Shilde aıynan bastap Almaty oblysynan 3,5 myń tonna kókónis (kartop, sábiz, pııaz, qyryqqabat) jetkizý josparlanýda. Sondaı-aq 5 myń tonna kartop jáne 2 myń tonna sábiz qoryn jasaý úshin Pavlodar oblysynyń taýar óndirýshilerine 300 mln teńge bólinedi», - dedi spıker.

Buǵan deıin Almatyda nan baǵasyn turaqtandyrýǵa 150 mln teńge bólinetini týraly jazǵan bolatynbyz.