Almatyda áleýmettik mańyzy bar dári-dármekterge kúndelikti monıtorıng júrgiziledi
ALMATY. QazAqparat – Almatylyqtardy dári-dármekpen jáne medıtsınalyq buıymdarmen úzdiksiz qamtamasyz etý máselesi jiti baqylaýda. Bul týraly Almaty qalasy kásipkerlik jáne ınvestıtsııalar basqarma basshysynyń orynbasary Qarlyǵash Ábdijabbarova onlaın brıfıngte aıtty, dep habarlaıdy QazAqparat tilshisi.
«Ákimdik, jetkizýshiler jáne dárihanalar arasynda kelisim jasaldy. Dárihanalardyń tizimi belgilendi, olarǵa áleýmettik mańyzy bar dári-dármekter men medıtsınalyq mańyzy bar buıymdardyń 69 ataýy jetkizilip turady. Qazirgi ýaqytta, bul tizim 105 júıe quraýshy dárihanadan 374 dárihanaǵa deıin kóbeıtildi. Bul sondaı-aq dárilerdiń jetkizilimin, olardyń baǵalary men satylýyn retteýge múmkindik beredi»,– dedi Qarlyǵash Ábdijabbarova.
Sonymen qatar, ol dárihanalarǵa kún saıyn monıtorıng júrgiziletinin atap ótti.
«Búgingi kúni asa qajetti 22 dári-dármektiń ataýy anyqtaldy, onyń ishinde qyzýdy túsiretin dáriler, antıbıotıkter, antıkoagýlıant, gormonaldy, bir rettik medıtsınalyq maskalar bar «, – dedi spıker.
