Almatyda áleýmettik mańyzy bar dári-dármekter qoryna 10 mlrd teńge bólindi
ALMATY. QazAqparat – Almatyda áleýmettik mańyzy bar dári-dármekter qoryna 10 mlrd teńge bólindi. Bul týraly Almaty qalalyq kásipkerlik jáne ınvestıtsııalar basqarma basshysynyń orynbasary Qarlyǵash Ábdijabbarova málim etti, dep habarlaıdy QazAqparat tilshisi.
«Almatyda dári-dármekter men medıtsınalyq mańyzy bar buıymdar boıynsha turaqtandyrý qory quryldy. Oǵan jergilikti bıýdjetten 10 mlrd teńge mólsherinde qarajat bólindi, bul 2021 jyldyń aqpanyna deıin ónimniń 69 ataýynyń qajetti qoryn qalyptastyrýǵa múmkindik beredi»,– dedi Q. Ábdijabbarova.
Onyń aıtýynsha, atalǵan qordyń basty maqsaty - áleýmettik suranysqa ıe dári-dármekpen jeke dárihanalar men statsıonarlardy qamtamasyz etý.
«Turaqtandyrý qorynyń sheńberinde statsıonarlyq emdeý nysandaryn qamtamasyz etý úshin medıtsınalyq quraldardyń jalpy qory belgilegen tarıfter boıynsha 5 mlrd teńge qarastyryldy, onyń 2,9 mlrd teńgesi juqpaly aýrýlar jáne provızorlyq statsıonarlar, 893 mln teńgesi – emhana jelisi úshin preparattar satyp alýǵa joldanatyn bolady. Qalǵan 1,2 mlrd teńgege medıtsına qyzmetkerleri jáne basqa da asa kóp suranysqa ıe statsıonarlyq preparattar úshin jeke qorǵanys quraldarynyń qorlary qalyptastyrylatyn bolady», - dep qorytyndylady Almaty qalalyq kásipkerlik jáne ınvestıtsııalar basqarma basshysynyń orynbasary Qarlyǵash Ábdijabbarova.
