Almatyda áleýmettik mańyzy bar azyq-túlik baǵasynyń ósýine jol berilmeıdi – ákimdik
Spıker megapolıste azyq-túlik baǵasy turaqtanyp, olardyń ósýine jol berilmeıtinin atap ótti.
«Satý baǵasyn turaqtandyrý dúkender men jergilikti bazarlardyń sórelerine taralady. Qala ákimdigi saýda jelilerimen, taýar óndirýshilerdiń iri birlestikterimen yntymaqtastyqta. Almatynyń bazarlary men saýda jelilerine tikeleı jetkizý uıymdastyrylǵan», - dedi spıker.
Vedomstvo ókili ákimdik pen Almaty oblysynyń kásiporyndary arasynda «JLC Sút» óndirýshisiniń súti men súzbesin «Magným» saýda jelisine, «Naz-Dana» ShQ pııazyna jáne «TJN jáne K» agrofırmasyna «Toımart» jáne «Magným» jelilerine, sondaı-aq «Birlik agrofırmasyna» «Toımart» jelisine tikeleı jetkizý týraly shart jasalǵanyn aıtty.
Budan bólek apta saıyn Almaty qalasynyń barlyq aýdandarynda demalys kúni azyq-túlik jármeńkesi uıymdastyrylady. Oǵan Almaty oblysynyń jaqyn aýdandarynyń aýyl sharýashylyǵy taýar óndirýshileri men megapolıstiń azyq-túlik kásiporyndary qatysady.
«2021 jyldyń basynan beri 380 jármeńke ótkizilip, 40 mln teńgeden astam somaǵa 5 myń tonnaǵa jýyq ónim satyldy. Sondaı-aq, biz jyl saıyn Almaty, Jambyl, Túrkistan jáne Shyǵys Qazaqstan oblystarynyń aýyl sharýashylyǵy taýar óndirýshileriniń qatysýymen aýyl sharýashylyǵy ónimderiniń keńeıtilgen jármeńkelerin ótkizemiz», - dedi Damır Tazabek.
Mysaly, qyrkúıek aıynda Almaty oblysy ónimderiniń jármeńkesi, sondaı-aq qala kúnine oraılastyrylǵan «Apple Fest-2021» alma festıvali ótti.
Almaty qalasy Kásipkerlik jáne ınvestıtsııalar basqarmasy basshysynyń orynbasary olardyń vedomstvosy negizgi bazarlarda, saýda jelilerinde jáne «úı janyndaǵy dúkenderde» áleýmettik mańyzy bar azyq-túlik baǵalaryna 15% saýda ústemesin saqtaý mánine turaqty negizde monıtorıng júrgizetinin tilge tıek etti.
«Bul jerde 2021 jylǵy 1 shildeden bastap «Qazaqstan Respýblıkasynyń Kásipkerlik kodeksine» ózgerister engizilgenin atap ótken jón. Oǵan sáıkes jergilikti atqarýshy organdar óz quzyreti sheńberinde ÁMAT-qa saýda ústemesi mólsheriniń saqtalýyna memlekettik baqylaýdy júzege asyrady. Іshki saýda sýbektisiniń saýda ústemesiniń mólsherin arttyrý faktileri anyqtalǵan jaǵdaıda eskertý jasalady. Bir jyl ishinde qaıtalap áreket jasaǵan jaǵdaıda shaǵyn bıznes sýbektileri úshin 10 AEK, orta bıznes úshin 75 AEK jáne iri bıznes úshin 300 AEK mólsherinde aıyppul salynady»,- dedi ol.
