Almatyda «áleýmettik qyzmetkerler» birneshe zeınetkerdi tonaǵan
ALMATY. QazAqparat – Almatyda eki áıel «áleýmettik qyzmetkermiz» dep qarttardy aldap, aqshalaryn urlap ketip otyrǵan, dep habarlaıdy QazAqparat tilshisi.
38 jastaǵy áıelder «áleýmettik járdemaqy ákeldik» dep zeınetkerlerdi aldap, úıine kiretin bolǵan.
Alaıaqtar zeınetkerlerdi áleýmettik tólemderge 6 myń teńge kóleminde járdemaqy qosylady dep sendirgen.
«Olar shynymen aqshany bergen. Aqsha bergen kezde qaskóıler qasaqana 10 myń nemese 20 myń teńge kóleminde iri aqshany usynǵan. Sodan keıin zeınetker qaıtarym aqsha berý úshin óziniń «jasyryn» jerine barǵan. Ári qaraı «qonaqtar» densaýlyǵyn tekserip, qysym ólsheýge keńes beredi. Muny isteý úshin tonometr men stetoskopty ózderimen birge alyp júrgen. Áıelderdiń biri egde jastaǵy adamdardyń qysymyn ólshep, sózge aınaldyrsa, ekinshisi aqsha salynǵan jerdi tazalap ketip otyrǵan», – dedi Bostandyq aýdandyq PB janyndaǵy polıtsııa bóliminiń basshysy Ǵalym Qasymbaev.
Áıelder 92 jastaǵy qarııanyń jyldar boıy jınaǵan 1 mıllıon 200 myń teńgesin alyp ketken.
Qazir kúdiktiler ustaldy. Aıta ketý kerek, kúdiktilerdiń biri buryn alaıaqtyq úshin jaýapqa tartylǵan. Qazir QR Qylmystyq kodeksiniń 188-baby boıynsha sotqa deıingi tergeý júrip jatyr. Ázirge olardyń 5 qylmystyq oqıǵaǵa qatysy bary anyqtaldy.
«Biraq naqty kórsetkish áldeqaıda joǵary bolýy múmkin. Osyǵan baılanysty bul adamdardyń zańsyz áreketterinen zardap shekken azamattardan 298-52-80 jáne 298-52-82 nómirlerine habarlasýlaryn suraımyz», – dedi Qasymbaev.
