Almatyda áleýmettik ınfraqurylymdardyń qurylysy qarqyndy júrip jatyr
ALMATY. QazAqparat – Megapolıs ákimi Baqytjan Saǵyntaev «Almaty» telearnasyndaǵy tikeleı efırde qalalyqtardyń mektepterge, balabaqshalarǵa, medıtsınalyq mekemelerge, sporttyq keshenderge degen suranysyn qamtamasyz etý mindetterin sheshý týraly aıtty, dep habarlaıdy QazAqparat tilshisi.
Almaty ákimi atap ótkendeı, «Almaty - 2050» strategııasynda belgilengen «Shetsiz qala» qaǵıdaty áleýmettik ınfraqurylymdy qadamdyq qoljetimdi jerlerde salynatyn aýqymdy qurylystar arqyly júzege asyrylady.
Baqytjan Saǵyntaevtyń aıtýynsha, túrli nysandardy: mektepterdi, balabaqshalardy, medıtsına mekemelerin, sporttyq keshender men nysandardy salý men rekonstrýktsııalaýda serpilis jasaý mindeti qoıylyp otyr.
«Bul Almaty qalasynyń turǵyndarynyń tez ósýine baılanysty. Tek sońǵy 10 jylda qala aýmaǵy eki esge ósti, al Almaty aglomeratsııasynyń halqy búginde 3 mıllıonnan astam adamdy quraıdy. Onyń ústine, halyq sany tabıǵı jolmen ósýde, jyl saıyn 30-35 myń jańa týǵan náreste ómirge kelýde,sondaı-aq ishki kóshi-qon da edáýir ulǵaııýda»,-deıdi ákim.
Sońǵy 10 jyl ishinde qalada mektep jasyna deıingi balalar sany 79 myń balaǵa artty. Mektepke deıingi uıymdarǵa 1-6 jas aralyǵyndaǵy 45 myńnan astam bala, 3-6 jas aralyǵyndaǵy 21 myń bala kezekte tur. Osy ýaqyt ishinde mektep oqýshylarynyń sany 120 myń adamǵa ósti. Búginde ortasha jyldyq ósimniń 12 myń oqýshyǵa artýy barysynda memlekettik mektepterdiń 40%-ynyń júktemesi ulǵaıǵan.
Sondyqtan, búginde ákimdik aldyndaǵy kezek kúttirmeıtin basty mindet – qalanyń mektepke deıingi jáne bilim berý oryndaryna degen suranysyn tolyq jabý, tym bolmasa taıaý jyldar ishinde.
Osyǵan oraı, bilim berý nysandaryn jedeldetip salýdyń úsh jyldyq arnaıy baǵdarlamasy qabyldandy.
«Byltyr 670 oryndy 4 memlekettik kúndizgi bóbekjaı-baqsha jáne 1,3 myń oryndy 48 jeke mektepke deıingi uıym salyndy. Bulardan ózge, 640 oryndy 4 memlekettik balabaqshanyń qurylysy júrip jatyr. Sondaı-aq, uzaq merzimdi jalǵa berýdi qaıtarý ári seısmıkalyq nyǵaıtý men kúrdeli jóndeýden keıin 315 oryndy memlekettik balabaqsha ashylady.
Mektepke deıingi oryndardyń tapshylyǵyn azaıtýǵa shaǵyn bıznes belsendi qatysýda. Tek bıyldyń ózinde 5 myń oryndy 65 jeke balabaqsha ashý josparlanýda. Sonymen qatar, 2,3 myń oryndy 10 balabaqshanyń jobalyq-smetalyq qujattary ázirlenip, olardy salatyn oryndar anyqtalýda»,-dep atap ótti Baqytjan Saǵyntaev.
Mektepke deıingi bilim berýdegi taǵy bir mańyzdy másele – ata-analardyń aqy tóleýi. Úkimet jeke balabaqshalardaǵy qosymsha qyzmetterdiń bıýdjetin ishinara óteý týraly bastamamyzdy qoldady, bul olardy qoljetimdi etýde.
Balamaly sheshim retinde balalary kezekte turǵan otbasylar úshin vaýcherli tetiktiń krıterııleri anyqtalýda, olar – az qamtylǵan otbasylar, kópbalaly otbasylar, jas otbasylar, múgedek ata-analar, jalǵyzbasty analar.
Qazir osy máselege qatysty daıyndyq jumystary júrýde ári bul tetik alǵash ret Almatyda iske asatyn bolady, sonyń arqasynda mektepke deıingi bilim berýmen qosymsha 5 myń balany qamtýǵa múmkindik týady.
«Orta bilim berý salasynda mektepter salý jáne modernızatsııalaý jumystary júrip jatyr. 2010 jyldan 2019 jylǵa deıingi kezeńde 15 jańa mektep jáne qoldanystaǵy 21 mekteptiń janynan 22 myń oryndy qosymsha nysandar salyndy. 2020 jyly Áýezov jáne Túrksib aýdandarynda 2 memlekettik mektep paıdalanýǵa berildi (1800 oryn), qoldanystaǵy mektepter janynan 5 qosalqy nysan (2017 oryn) iske qosyldy jáne 5,2 myń oryndy 2 jekemenshik mektep (1390 oryn) paıdalanýǵa berildi»,- dedi ol.
Bıyl bıýdjet esebinen Alataý, Naýryzbaı jáne Túrksib aýdandarynda 12,6 myń oryndy 8 mektep salynyp jatyr. Mektepter janynan 8,2 myń oryndy 17 qosalqy nysandar boı kóteredi. Oqý úderisin jaqsartý úshin ınvestorlar da tartylýda. Bıyl 1700 oryndy 6 jekemenshik mektep ashylady.
Nátıjesinde 2021 jyly mektepterdegi oryn tapshylyǵy 73% nemese 22,6 myń oqýshy orynǵa qysqarady. Onyń ústine, muǵalimder men basqa mamandarǵa 1,5 myńnan astam jumys orny qurylady.
Sonymen qatar, 2022-2023 jyldary 6 myńǵa jýyq oqýshy orynǵa arnalǵan taǵy 14 jobany iske asyrý josparda.
Memlekettik-jeke áriptestik aıasynda qosymsha 8 mektep salynady jáne rekonstrýktsııalanady.Taıaýdaǵy 2 jylda taǵy 6,3 myń oqýshy oryn ashylatyn bolady.
