Almatyda áleýmettik az qamtylǵan otbasylardy qorǵaý qory qurylady
ALMATY. QazAqparat - Almaty bıznesmenderi kópbalaly jáne turmysy tómen otbasylardy qoldaý úshin 35 mln teńge jınap úlgerdi. Osylaısha olar «Nur Otan» partııasy qalalyq bólimshesiniń fraktsııa jetekshisi Murat Ádilhanovtyń «muqtaj otbasylardy qoldaý úshin arnaıy qor ashaıyq» degen usynysyna qoldaý bildirdi, dep habarlaıdy QazAqparat tilshisi.
Onyń aıtýynsha, «Baqytty otbasy» jańa qoǵamdyq qory muqtaj otbasylarǵa ataýly kómek berýge qarajat jınaý úshin ashyldy.
«Búginde álemde bıznestiń jaǵdaıy máz emes. Sonda da bıznes qaýymdastyq qınalǵan otbasylardy kórse, kómek qolyn sozýdan tartynbaıdy dep oılaımyn. Men ózim kópbalaly otbasynda óstim. Qazir biz jekelegen otbasylarǵa kómektesip jatyrmyz. Biraq bul jetkiliksiz. Barlyǵymyz birigip, jalpyqalalyq qor qurýymyz kerek. Sonda kópshilikke kómek bere alamyz», - dedi Murat Ádilhanov.
Partııa ókiliniń usynysyn «Q3 Worldwide» ınvestıtsııalyq qorynyń dırektory Qaırat Qudaıbergen, «Kassanov Investment group» prezıdenti Zııatdın Kasanov, «Metall Prom» JShS bas dırektory Abdýhalıl Dolkýntaı, «Almatyınjstroı» AQ bas dırektory Ashat Shılikbaev qoldady.
Nur Otan partııasy fraktsııa jetekshisiniń aıtýynsha, qor jumysy barynsha kópshilikke jarııa bolmaq. Barlyq máseleler baqylaý keńesiniń qadaǵalaýymen sheshiletin bolady.
Atalǵan keńeske jýrnalıster, blogerler, qoǵam qaıratkerleri, kópbalaly otbasylardyń músheleri kire alady. Sonymen qatar, qala bıligi kópbalaly analardyń quqyǵyn qorǵap júrgen belgili jýrnalıst Sáýle Ábedınovaǵa atalǵan qorǵa múshelikke ótýge keńes berdi.
