Almatyda álemdegi jetekshi joǵary oqý oryndaryndaǵy tájirıbe negizinde oqý josparyn jetildirý máseleleri talqylandy
ALMATY. 4 shilde. QazAqparat - Almatydaǵy ál-Farabı atyndaǵy Qazaq ulttyq ýnıversıtetinde «Jetekshi shetel joǵary oqý oryndarynyń jáne Nazarbaev Ýnıversıtetiniń tájirıbesi negizinde oqý josparyn jetildirý» degen taqyrypta jıyn ótti.
Bul - QR Bilim jáne ǵylym mınıstrliginiń Joǵary jáne joǵary oqý ornynan keıingi bilim berýdiń respýblıkalyq oqý-ádistemelik keńesiniń (ROÁK) gýmanıtarlyq jáne jaratylystaný mamandyqtary boıynsha oqý-ádistemelik sektsııasynyń otyrysy. Ýnıversıtettiń ROÁK Oqý-ádistemelik sektsııasy elimizdiń 22 jetekshi joǵary oqý ornyn biriktiredi jáne respýblıkamyzdyń joǵary jáne joǵary oqý ornynan keıingi bilim berýdiń barlyq mamandyqtarynyń besinshi bóligine jetekshilik etedi.
«Joǵary bilim berýde oqý baǵdarlamalarynyń sapasyn arttyrýdyń tıimdi mehanızmi olardy halyqaralyq akkredıtatsııadan ótkizý bolyp tabylady. Baǵdarlamalardy akkredıtteý sapanyń halyqaralyq dárejede moıyndalýynyń jáne túlekterdiń ǵalamdyq básekege qabilettiliginiń kepili bolmaq. Oqý baǵdarlamalaryn jobalaýdaǵy zamanaýı álemdik tájirıbeniń taǵy bir ereksheligi - biliktilik (quzyrettilik) tásildemesi. Zamanaýı JOO-nyń maqsaty - nátıjege negizdelgen bilim berý, demek quzyretti maman daıarlaý. Ál-Farabı atyndaǵy QazUÝ-diń ınnovatsııalyq oqý josparynda joǵary bilim berýdegi atalǵan eki álemdik úrdis kórinis tapqan», - deıdi ýnıversıtettiń birinshi prorektory Muqambetqalı Búrkitbaev.
