Almatyda Alekseı Melnıkovtiń fotokórmesi ashyldy

Fotosýret túsirý óneri 30 jastaǵy almatylyq jigittiń qarbalasqa toly ómiriniń bólinbes bir bóligine aınalǵan ispetti. Onyń shyǵarmashylyǵynda taý týrızmi, aqparattyq tehnologııa, tipti orman ósirý taqyryptary da kórinis tapqan.

"Búgingi kórmemde syrǵa toly tabıǵattyń kórkem jerleri men jan-janýarlar sýretteri qoıylǵan. Bul arqyly jurtshylyqqa tabıǵattyń adamdardyń áserinsiz, tek qaz qalpynda bolǵan kezde ǵana ádemi bolatynyn jetkizgim keldi", - deıdi Alekseı Melnıkov.

24 jeltoqsanǵa deıin jalǵasatyn kórmege A. Melnıkovtyń 2004 jyldan beri túsirgen 200 týyndysy qoıylǵan.

«Osynnan almatylyqtardyń janyna jaqyn Medeý, Іle, Túrgen shatqalyn fotosýretshiniń ózindik sıpatymen kóre alasyz. Jumystardyń «Órik túsi - shyǵys kóktemi shyryny túsi», «Shúıke bulttar», «Jaryq pen shyrshalar úndesýi» syndy ataýlary da romantıka men názik sezim boıaýlaryna toly. Sonymen qatar mundaǵy fotosýretter tabıǵatty odan ári aıalaı túsýge shaqyrady», - dep atap ótti óz sózinde QR Memlekettik Ortalyq murajaıynyń qyzmetkeri Ásel Belibaeva

Fotokórmeniń bir ereksheligi, munda qoıylǵan fotosýretterdiń barlyǵy úlken formatta shyǵarylǵan.