Almatyda alaıaqtyq jolmen akkaýnt satqan stýdent ustaldy
ALMATY. QazAqparat - Almatyda alaıaqtyq jolmen Instagram jelisinde jaqsy qaralymǵa ıe paraqshalardy satqan stýdent ustaldy, dep habarlaıdy QazAqparat tilshisi.
Polıtsııanyń málimetinshe, 2001 jyly týǵan A. esimdi azamattyń is júzinde óz paraqshasy bolmaǵan. Ol Instagram jelisinde jaqsy qaralymǵa ıe paraqshalardy satatyny týraly habarlandyrýdy, tanymal ınternet-resýrstarǵa ornalastyrǵan. Qaladaǵy JOO-nyń birinde oqıtyn birinshi kýrs stýdenti buryn osyǵan uqsas quqyq buzýshylyqtar úshin jaýapqa tartylǵany anyqtaldy.
«Kúdikti óziniń habarlamasynda kóptegen jazylýshylary bar ınstagramm paraqtaryn usynǵan. Sáıkesinshe, onyń jábirlenýshileri ózi sııaqty stýdentter men jeke kásipkerler bolǵan. Olar sol paraqsha arqyly ózderiniń taýarlaryn ótkizbekshi edi. Kelisý kezinde kúdikti paraqqa aldyn ala tólem jasaýdy talap etken. Ol óziniń bank kartasyna 10 myń teńgeden 100 myń teńgege deıin saldyrǵan. Sodan keıin baryp logın men paroldi beremin dep ýáde etken. Biraq sózinde turmaǵan, aqshany alǵannan keıin ol óziniń «klıentin» buǵattap, joq akkaýntardy «saýdalaýdy» jalǵastyrdy. Keıbir adamdar onyń túrin kórý úshin vıdeoqońyraý shalǵan. Ol qońyraýlarǵa batyl jaýap berip, sózine sendirgen», - deıdi Áýezov aýdandyq polıtsııa basqarmasynyń bastyǵy Álisher Tursynbetov.
Qazirgi ýaqytta kúdiktige qatysty QR QK «Alaıaqtyq» baby boıynsha sotqa deıingi tergeý júrgizilýde.
Polıtsııa kúdiktiniń áreketterinen zardap shekkenderden habarlasýyn suraıdy: 8-707-515-47-35; 8-701-852-60-94
