Almatyda alaıaqtyq tizbekke paıdalanylǵan SIM-box qurylǵysy tárkilendi
Almatylyq polıtseıler «Mobaıl Telekom servıs» kompanııasynyń qaýipsizdik qyzmetkerleri men birlese otyryp telefon arqyly alaıaqtyq qylmys jasaǵan kúdiktilerdi qolǵa túsirdi. Myńdaǵan telefon kartalary men qurylǵy saqtalǵan páter Áýezov aýdanynda anyqtaldy.
«34 jastaǵy kúdikti SIM-kartalardy tirkep, Reseıdegi habarlama habyna satýǵa daıyndaǵan. Atalǵan kúdiktiniń zańsyz áreketi arnaıy mamandardyń kómegimen anyqtaldy. Túrli mobıldi baılanys operatorlarynyń myń SIM-kartasy, telefon nómirleri bar derekter qory jáne ártúrli tehnıkalyq qurylǵylar tárkilendi. Atalǵan derek boıynsha sotqa deıingi tergeý amaldary bastaldy», – dedi Almaty qalasy polıtsııa departamenti bastyǵynyń orynbasary Dıdar Ahanov.
Polıtsııa málimetinshe, atalǵan páterdi tintý barysynda SIM-box qurylyǵysynyń 12 danasy, SIM-karta salýǵa arnalǵan 432 slot, SIM-Bank anyqtaldy.
Tergeý múddesine oraı ózge aqparattar jarııa etilmeıdi. QR QPK-niń 201-babynyń talaptaryna, sondaı-aq QR Konstıtýtsııasynyń normalaryna sáıkes, qylmystyq is boıynsha ózge de málimetter jarııa etýge jatpaıtynyn habarlaıdy.
