Almatyda alaıaqtar burynǵy zaýyttyń jerin satyp jibergen
ALMATY. QazAqparat - Almatyda burynǵy zaýyttyń jerin satyp júrgender ustaldy, dep habarlaıdy QazAqparat tilshisi.
Anyqtaý jumystaryn vedomstvoaralyq top - Ulttyq qaýipsizdik komıteti men ІІD qyzmetkerleri júrgizgen. 72 adam atalǵan alaıaqtyq árekettiń qurbany bolyp otyr. Qylmyskerler 600 myń dollar kóleminde paıda tapqan.
«Sotqa deıngi tergeý amaldarynyń nátıjesi boıynsha, «Kamenskıı» zaýytynyń burynǵy qyzmetkerleri Ý.Mamytbaev, S.Quljabaev, A.Nurshabaev, A.Tıý 2008 jyldan beri zańdyq quqy joq qujattar arqyly zaýytqa tıesili jerlerdi satyp kelgen. Olar 72 adamnan 500-600 myń dollar shamasynda paıda tapqan», - dedi qalalyq ІІD baspasóz qyzmetinen.
Almaty polıtsııasy zardap shekkender 72 adamnan da kóp bolýy múmkin ekenin aıtady. Vedomstvo alaıaqtardy sýreti arqyly tanyǵandar bolsa, habarlasýlaryn suraıdy.
