Almatyda alaıaq «úı áperemin» dep eldi aldap, 400 mln teńgeni qaltasyna basqan
ALMATY. QazAqparat - Almaty polıtsııasy azamattardy aldap, 400 mln teńgesin qoldy etken er adamdy qamaýǵa aldy, dep habarlaıdy QazAqparat tilshisi.
Qalalyq PD tergeý basqarmasy 43 jastaǵy ShQO týmasyna qatysty tergeý amaldaryn bastady.
Ol 2014 jyldan bastap elge «Han Táńiri» turǵyn úı kesheninen memlekettik baǵdarlamamen jalǵa beriletin úı alyp beremin dep ýáde etken. Sonymen qatar, elektrondy saýdadan jer ýchaskelerin, kólik alyp beremin dep aldaǵan.
Osylaısha 400 mln teńge materıaldyq shyǵyn keltirgen.
«Bul derek boıynsha QR QK 190-babynyń 4-bólimimen sotqa deıingi tergeý amaldary bastaldy. Mamandandyrylǵan aýdanaralyq ekonomıkalyq sotynyń sheshimimen kúdiktini qamaý týraly bultartpaý sharasy qabyldandy», – dedi PD bólim basshysy Ádil Salaev.
Polıtsııa osy adamnyń áreketinen zardap shekken adam bolsa, 261-84-90, 254-40-59, 8-775-284-55-56 telefondaryna habarlasýyn suraıdy.
