Almatyda alaıaq áıel arzan azyq-túlik jetkizip beremin dep jurtty aldaǵan
ALMATY. QazAqparat – Almatyda 33 jastaǵy alaıaq kelinshek halyqty aldap, 35 mln teńgeni qoldy etken, dep habarlaıdy QazAqparat tilshisi.
Almaty qalalyq polıtsııa departamenti bastyǵynyń tergeý jónindegi orynbasary Rýstam Ábdirahmanov málim etkendeı, kúdikti jergilikti turǵyndardy arzan azyq-túlikpen qamtamasyz etemin dep aldap soqqan.
«Almatylyq 33 jastaǵy áıeldiń azyq-túlikti bazardan tómen baǵamen jetkizemin degen jeleýmen iri kólemde aqsha alǵany anyqtaldy. Qazirgi ýaqytta keltirilgen materıaldyq shyǵyn 35 mln teńgeden asady», - dep jazdy Rýstam Ábdirahmanov óziniń Instagram -daǵy paraqshasynda.
Qazirgi tańda QR QK 190-babynyń 3-bólimimen qylmystyq is qozǵaldy.
1989 jyly týǵan áıelge qatysty sot qamaýǵa alý túrindegi bultartpaý sharasyna sanktsııa berdi.
«Búgingi kúni kúdiktiniń qala aýmaǵynda osyǵan uqsas qylmystarǵa qatysy bar-joǵyn anyqtaý úshin qajetti tergeý sharalary júrgizilýde», - dep tolyqtyrdy polıtsııa ókili.
