Almatyda «Alashtyń Aqan serisi» dástúrli ánder keshi ótti

Sharany «Adyrna» ulttyq-etnografııalyq birlestigi men Qazaqstan Jazýshylar odaǵy birlese uıymdastyrdy. Keshtiń maqsaty jas urpaqqa kórnekti kompozıtor, aqyn, ánshi Aqan seriniń shyǵarmashylyq murasyn nasıhattap, ulttyq rýhyn oıatýǵa baǵyttalǵan.

Keshtiń saltanatty ashylýynda sóılegen fılologııa ǵylymdarynyń doktory, professor Tursynbek Kákishev Aqan murasynyń áli kúnge ashylmaǵan qyrlary baryn atap ótti. «Aqan týraly aıtylar áńgime munymen bitpeıdi. Al búgingideı jastardyń osy ulttyq ónerimizdi nasıhattaýǵa belsendi atsalysyp jatqandary bizdi qýantady», - dedi ǵalym.

Keshke Qaırat Baıbosynov, Jolaman Qujımanov, Ramazan Stamǵazıev, Ardaq Isataeva, Sáýle Janpeıisova sekildi dástúrli án sheberleri men jas ánshiler qatysty.

Kesh barysynda Aqan seri jaıynda túsirilgen derekti fılm kórsetildi. Án keshinde seri Aqannyń «Syrymbet», «Maqpal», «Kókshetaý», «Qulager», «Qulagerdiń jelisi», «Qaratorǵaı», «Kókjendet», «Shamshı qamar» jáne «Mańmańger» sekildi áıgili ánderi shyrqaldy.

«Bizge bul sharýany atqarý ońaıǵa soqpady. Alaıda sharany uıymdastyrýǵa qatysqan jastardyń ynta-yqylasynyń arqasynda júzege asty. Biz aldaǵy ýaqyttarda án atasy Birjan sal men basqa da ánshilerdiń, sondaı-aq jyraýlarymyzǵa arnalǵan kesh ótkizýdi qolǵa alǵaly otyrmyz», - dedi atalmysh sharanyń uıymdastyrýshysy, «Adyrna» ulttyq-etnografııalyq saıtynyń bas redaktory Arman Áýbákir.