Almatyda Alash tarıhynyń aqtańdaqtaryn ashatyn birneshe kitaptyń tanystyrylymy ótti - FOTO
ALMATY. QazAqparat - Almatyda búgin Alash tarıhynyń aqtańdaqtaryn ashýǵa septesetin birneshe kitaptyń tusaýkeseri ótti.
Atap aıtqanda, Asfendııar Kenjınniń «Sbornık dokýmentov ı materıalov», N.Asqarulynyń «Tórebek Osmanuly - tuńǵysh bankır», A.Lekerovanyń «Pervyı ekonomıst, professor Ázimbaı Lekerov», Ahmet Baıtursynulynyń «Qazaq til biliminiń máseleleri», Qudaıbergen Jubanovtyń «Qazaq til biliminiń máseleleri» atty týyndylar tanystyryldy.
Alash zııalylarynyń ómiri men qyzmetin zertteýdi «Ádilet» tarıhı-aǵartý qoǵamy júzege asyrǵan. Al, shyǵarmalardyń jaryq kórýine «Arys» qorynyń prezıdenti Ǵarıfolla Ánes demeýshilik kórsetti.
«Ádilet» qoǵamy búginde tarıh ǵylymynyń damýyna ólsheýsiz úles qosyp otyr. Osydan bes jyl buryn Jańalyq eldi mekeninde saıası qýǵyn-súrginge ushyraǵandardyń qorymyn anyqtap, sol aımaqtyń memorıaldyq keshenge aınalýyna tikeleı yqpal etken bolatyn. Bizdiń uıym osy ýaqytqa deıin Qazaqstan tarıhynyń mańyzdy kezeńi repressııa jyldary jaıly mol maǵlumat jınady. Bul derekter, álbette, alash zııalylarynyń ómirin zertteýde óz paıdasyn tıgizedi», - dedi «Ádilet» qoǵamynyń basqarma múshesi Elena Glebanova.
Al qazaqtyń tuńǵysh ekonomısi Ázimbaı Lekerov týraly onyń qyzy Aısedora Lekerova baıandap berdi.
«Meniń ákem memlekettik qaıratker, lıngvıst, aýdarmashy, professor bolǵan. Osyndaı zulmat jyldarda qanshama qazaqtyń arystaryna ashtyq pen ujymdastyrýdy jasaýǵa úlesin tıgizýge týra keldi. Alaıda, meniń ákem bul naýqandardyń eshqaısysyna qolyn tıgizbegen. Men buny maqtan tutamyn», - dedi Aısedora Lekerova.
