Almatyda «ALASH PRIDE-ACB» halyqaralyq týrnıriniń salmaq ólsheý rásimi ótti
ALMATY. QazAqparat - Almatyda «ALASH PRIDE-ACB» halyqaralyq MMA týrnıri aıasynda sportshylardyń salmaq ólsheý jáne júzbe-júz, kóz túıistirý rásimi ótti, dep habarlaıdy QazAqparat tilshisi.
«ALASH PRIDE-ACB» týrnırinde sportshylardyń 15 juby búgin salmaqtaryn ólshep, erteńgi saıysqa daıyndyqtaryn kórsetti. Salmaq ólsheý rásimin TMD jáne Reseı boıynsha eń úzdik rıng-habarlaýshysy Aleksandr Zagorskıı júrgizdi.
Jekpe-jek keshi Almaty qalasynyń 1001 jyldyǵyna arnalady. Saıystyń basty jekpe-jegi qazaqstandyq Arman Ospanov pen brazılııalyq Tıago Lýısa Sılva arasynda ótedi.
Aıta keteıik, 9 qyrkúıek kúni «ALMATY ARENA» sport kesheninde «ALASH PRIDE» promoýterlik kompanııasy «ASV» promoýshenimen birlese otyryp, Almaty qalasy ákimdiginiń qoldaýymen Qazaqstan tarıhyndaǵy eń aýqymdy, halyqaralyq MMA týrnırin ótkizedi.
Bul keshtiń basty jekpe-jegi Arman «SUŃQAR» Ospanov pen brazılııalyq Tıago «MANCHINHA» Lýıs Sılva arasynda ótedi.
Qazaqstannyń eń úzdik faıteri, «Alash Pride FC» sarbazy - Arman Ospanov kásipqoı aralas jekpe-jekte segiz kezdesýge shyǵyp barlyǵynda aıqyn jeńgen. Ol áskerı sambodan QR eńbek sińirgen sport sheberi, qoıan-qoltyq urystan álem jáne TMD chempıony, áskerı sambodan álemniń úsh dúrkin chempıony. Onyń qarsylasy Tıago Lýıs Sılva (12-5) brazılııalyq djıý-djıtsýdan qara belbeýdiń ıegeri jáne «Shooto Brasil» uıymynyń álem chempıony.
Bul MMA týrnıriniń aıasynda belgili qazaqstandyq sportshylar, «Alash Pride FC» ókilderi - Asyljan Baqytjanuly, Evgenıı Egemberdıev, Asý Almabaev, Qarshyǵa Dáýitbek, Bahtııar Nesipbek pen legıonerimiz Mýrod Hantýraev jáne Igor Svırıd aıqasqa túspek. Týrnırde segiz buryshqa jalpy 15 jup 11 jekpe-jekke shyǵady. Olar Reseı, AQSh, Brazılııa, Lıtva, Rýmynııa jáne Tájikstan syndy elderdiń atyshýly faıterleri.
«ALASH PRIDE - ASV» týrnırine belgili amerıkalyq UFC referıi - Djon Makkartı men Herb Dın óziniń ádilqazylar brıgadasymen tóreshilik etedi. UFC-diń úsh dúrkin eks-chempıony Frenk Mır tikeleı efırde atalǵan jekpe-jek keshiniń kommentatory bolmaq.
