Almatyda ALA jazýy formasyndaǵy baq paıda bolady
ALMATY. QazAqparat – Almatyda qalanyń halyqaralyq kody – ALA áripteri formasynda baq otyrǵyzylyp jatyr, dep habarlaıdy QazAqparat tilshisi.
ALA jazýy ǵaryshtan kórinip, Almaty baǵy Gınnestiń rekordtar kitabyna enýi múmkin. Áripter formasyndaǵy baq áýe kemesi qonýǵa daıyndalǵanda borttaǵylarǵa kórinetindeı etip otyrǵyzylǵan.
«Dúnıejúzilik tarıhta qalýǵa tyrysamyz. Bul biregeı oryn Gınnestiń rekordtar kitabyna eń úlken sóz retinde kire alady», - deıdi joba avtory, prodıýser Dáýit Shaıhıslamov.
Avtordyń aıtýynsha, 3 gektardan asa alqapqa 2,5 myń eki metrlik arsha otyrǵyzylǵan.
«Aǵashtar – bolashaq urpaqqa mura. Olar ondaǵan jyldar boıy ósip, jasyl jelekti qalyptastyryp, eń mańyzdy adamı qundylyqtardy beıneleıdi. Osy belgi arqyly biz qalaǵa degen súıispenshiligimizdi bólisemiz», - deıdi Dáýit Shaıhıslamov.
Erteń, 18 qarashada qoǵam belsendileri Almaty ákimdigimen birlese ALA baǵyn otyrǵyzýdy aıaqtaıdy.
Vıdeodan alynǵan kadr instagram.com/daut.shaikhislamov
