Almatyda ál-Farabı men Abaı dańǵyldarynda jol jóndeý jumystary bastaldy
ALMATY. QazAqparat- Ál-Farabı dańǵylynyń boıy Dostyq dańǵylynan Asqarov kóshesine deıingi bóliginde kólik qozǵalysyn ishinara shekteı otyryp ortasha jóndeý jumystary bastaldy, dep habarlaıdy QazAqparat tilshisi.
Sonymen qatar 6 maýsymnan bastap ál-Farabı dańǵylynda Esentaı ózeninen ótetin kópir boıynda rekonstrýktsııa jumystary júrgizilýde. Joba boıynsha kópir rekonstrýktsııadan ótip, eki jaıaý júrginshilerge arnalǵan arnaıy kópir salynatyn bolady. Qazirgi tańda ınjenerlik kommýnıkatsııalardy qaıta ornalastyrý jáne aınalyp ótý jolyn ashý úshin bólý jolaǵynda daıyndyq jumystary júrip jatyr.
Sondaı-aq ortasha jóndeý jumystary Abaı dańǵyly Dostyq dańǵylynan Tilendıev kóshesine deıingi bóliginde de bastaldy.
Qala turǵyndaryna yńǵaıly bolýy úshin jumys barysynda kólik qozǵalysy ishinara ǵana shekteledi. Magıstraldy kóshelerdiń ortasha jóndeý jumystaryn oqý jylynyń basyna deıin aıaqtaý josparlanǵan.
«Ál-Farabı dańǵyly buǵan deıin 2010 jyly, al Abaı dańǵyly 2012 jyly jóndelgen. Jóndeýaralyq merzimniń ótýine baılanysty tekserý jumystary júrgizilip, nátıjesinde jol boıynda shuńqyr, oıylǵan, jarylǵan, otyrǵan jerler anyqtalyp, joldyń jaǵdaıy týraly tehnıkalyq qorytyndy jasaldy. Tehnıkalyq qorytyndy negizinde atalǵan ýchaskelerdi ortasha jóndeý jumysy josparyna qosyldy»,- dep habarlady Almaty qalalyq mobıldilik basqarmasynan.
Atalǵan jumystar ortasha jol jóndeý jumystary aıasynda josparlanǵan. Jol jóndeý jumystaryna baılanysty kólik qozǵalysynyń shektelýi týraly aqparat BAQ arqyly aldyn ala jarııalanyp otyratyn bolady.
«Keltirilgen qolaısyzdyqtar úshin keshirim ótinemiz jáne jol júrý baǵyttaryńyzdy aldyn ala josparlaýlaryńyzdy suraımyz»,- dep atap ótti basqarma ókilderi.
