Almatyda ál-Farabı dańǵylynda kólik qozǵalysy shekteledi
Almaty qalalyq mobıldilik basqarmasy málim etkendeı, ál-Farabı dańǵylynyń ońtústik betinde jumystar tolyǵymen aıaqtalyp, soltústik betinde Dostyq dańǵylynan Gagarın dańǵylyna deıin jóndelgen bolatyn. Endi 9 tamyz saǵat 23-00-den 11 tamyz saǵat 07-00 aralyǵynda dańǵyldyń Gagarın dańǵylynan Dýlatı dańǵylyna deıingi bóliginiń soltústik betinde polımerli asfaltbeton jabynyn tóseýge baılanysty kólik qozǵalysy shekteledi. Jol qozǵalysy qaýipsizdigin qamtamasyz etý úshin jáne ótkizý qabiletin arttyrý maqsatynda ortasha jóndeý kezinde kelesi sharalar qoldanylady:
- 10 tamyz saǵat 07-00 men saǵat 24-00 aralyǵynda Gagarın dańǵylynan Dýlatı dańǵylyna deıin ońtústik betinde reversıvti kólik qozǵalysy uıymdastyrylady;
- túngi ýaqytta jol kólik oqıǵalaryn aldyn alý úshin 11 tamyz saǵat 00-00 men saǵat 07-00 aralyǵynda batys baǵytta kólik qozǵalysy tolyǵymen shekteledi;
- 9 tamyz saǵat 23-00 men 11 tamyz saǵat 7-00 aralyǵynda Rozybakıev kóshesinen batys baǵytta burylys, Ál-Farabı dańǵylynan Naýaı kóshesine soltústik baǵytta burylysta kólik qozǵalysy shekteledi. Jóndeý jumystaryn Toraıǵyrov, Naýaı jáne Mustafın kósheleri arqyly aınalyp ótýge bolady.
«Jol qozǵalysyna qatysýshylardyń qaýipsizdigin patrýldik polıtsııa qyzmetkerleri qamtamasyz etedi. Reversıvti kólik qozǵalysy kezinde jyldamdyqty saǵatyna 40 shaqyrymǵa deıin shekteý týraly belgiler qoıylyp, jolaqtar konýsty fıshkalarmen belgilenedi. Reversıvti qozǵalys aldynda eki jaqtan kólik aǵyndaryn bólip turatyn metall týrnıketter qoıylady», - dep habarlady qalalyq mobıldilik basqarmasy.