Almatyda Ál-Farabı dańǵylynan joǵaryda qurylys salý talaby ózgerdi
ALMATY. QazAqparat - Almatyda Ál-Farabı dańǵylynan joǵary aımaqta qurylys salý talaby ózgerdi, dep habarlaıdy QazAqparat tilshisi.
Máslıhattyń sheshimine tıisti ózgerister engizý týraly qujat elektrondy úkimet portalynda jarııalandy.
«Shyǵys aınalma jolynan, ál-Farabı dańǵylynan, Saın, Jandosov kóshesinen joǵary aımaqta salynatyn ǵımarattyń bıiktigi úsh qabattan nemese 12 mterden aspaýy kerek. Bul talap áleýmettik mańyzy bar halyqaralyq deńgeıdegi densaýlyq saqtaý, bilim, mádenıet jáne týrızm salasyndaǵy ǵımarattardan basqalaryna tolyq júredi», - dep jazylǵan jańa qujatta.
Buǵan deıingi reglamentte ǵımarattardyń astynda parkıng bolǵan jaǵdaıda kólemi 15 metrden aspaýy kerek degen talap bolǵan.
Sonymen qatar, bul ereje júrmeıtin ǵımarattardyń qataryna mádenıet jáne týrızm nysandary da qosyldy.
Atalǵan qujatty qoǵamdyq talqylaý 25 naýryzǵa deıin jalǵasady.
