Almatyda ál-Farabı dańǵyly jóndeýden ótedi
Almaty ákimdiginiń málimetinshe, bıyl ál-Farabı daǵylynyń Toraıǵyrov kóshesindegi jolaıryqtan Dostyq dańǵylyndaǵy jolaıryqqa deıingi aralyqtaǵy jalpy uzyndyǵy 9,3 shaqyrymdy quraıtyn bólikte ortasha jóndeý jumystaryn júrgizý josparlanǵan.
«Qazirgi ýaqytta jóndeý jumystary kólik qozǵalysyn ishinara shekteý arqyly júrgizilýde. Jóndeý jumystary aıasynda joldaǵy jıektastardy tegisteý qarastyrylǵan. Tegisteý kezinde jıektastar alynyp, joldyń boıynda tıisti deńgeıde qaıta ornatylady. Jóndeý jumystary júrip jatqan aýmaqta 34 500 m jıektas bolsa, onyń tek 7683 metri ǵana alynyp, sol jerge qaıta ornatylady», - dep habarlady ákimdik.
Merdigerler atap ótkendeı, jıektas aýystyrylmaıdy, sebebi olar granıtten jasalǵan jáne óte tózimdi. Olar tek tegisteledi.
«Tegisteý degenimiz – qısaıǵan jıektastardy alyp, qaıta ornyna ornatý. Jol qozǵalysy kezinde jıektastarǵa mashınalar tıip ketýi múmkin nemese arnaıy tehnıka qar tazalaý kezinde qısaıtyp ketýi múmkin. Jıektas pen jol jabynynyń arasyndaǵy sańylaýlar jol betinde jaryqtardyń paıda bolýyna alyp kelýi múmkin. Jumys sapasyn arttyrý úshin asfaltbeton jabynyn tóser aldynda jıektastar tegis ári tik turýy tıis», - dedi merdiger kompanııa ókili.
Eske salsaq, ál-Farabı dańǵyly buǵan deıin 2010 jyly jóndeýden ótken.
«Jóndeýaralyq merzimniń ótýine baılanysty tekserý jumystary júrgizilip, nátıjesinde jol boıynda shuńqyr, oıylǵan, jarylǵan, otyrǵan jerler anyqtalyp, joldyń jaǵdaıy boıynsha tehnıkalyq qorytyndy jasaldy. Tehnıkalyq qorytyndy negizinde atalǵan ýchaskelerdi ortasha jóndeý jumysy josparyna qosyldy», - dep habarlady ákimdikten.
