Almatyda ál-Farabı dańǵyly boıynda júk kóligi birneshe kólikti soqty
ALMATY. QazAqparat – Almatyda ál-Farabı dańǵyly boıynda iri jol apaty boldy, dep habarlaıdy QazAqparat tilshisi.
Almatyda ál-Farabı dańǵyly boıynda júk kóligi qatty jyldamdyqpen birneshe kólikti soqty. Oqıǵa ornynda túsirilgen vıdeolar áleýmettik jelige shyqty.
«Ál-Farabıdiń boıynda iri jol apaty, kólik qozǵalysyn baıaýlatty, oqıǵanyń mán-jaıy anyqtalýda», - delingen vıdeodaǵy jazbada.
Kýágerlerdiń aıtýynsha, jıektastardy tıegen júk kóliginiń tejegishi isten shyǵyp, joldyń qarama-qarsy betine shyǵyp ketken.
Almaty polıtsııasy atalǵan jol apatyna qatysty túsinik berdi.
«Saǵat 15:05-de Mercedes avtokóliginiń júrgizýshisi Jamaqaev kóshesi boıymen soltústik baǵytta kele jatyp, ál-Farabı dańǵylynyń qıylysynda bólgish qorshaýǵa soǵylyp, týra júrip ketip, dańǵyldyń boıymen batysqa qaraı kele jatqan úsh kólikpen soqtyǵysqan. Ary qaraı júk kóligi joldyń jıegine shyǵyp ketken. Jol apaty saldarynan júk kóliginiń júrgizýshisi men jolaýshysy zardap shekti», - delinedi qalalyq polıtsııa departamenitniń habarlamasynda.
Eske salaıyq, Almatyda ál-Farabı dańǵyly boıynda ortasha jóndeý jumystary merziminen buryn aıaqtalǵan edi.
