Almatyda Ál-Farabı atyndaǵy QazUÝ-dyń hımııa fakýltetiniń jańa zerthanalary ashyldy
Y. Tamyzdyń 23-i. QazAqparat /Erbol Turymbetov/ - Búgin Almatyda Ál-Farabı atyndaǵy Qazaq ulttyq ýnıversıteti hımııa fakýltetiniń jań a oqý jylyndaǵy zamanaýı oqý zerthanalarynyń tusaýy kesildi, dep habarlaıdy QazAqparat.
2009 jyly QazUÝ-dyń 75 jyldyq mereıtoıynda Elbasy Nursultan Nazarbaev hımııa fakýltetiniń jańa ǵımaratyn saltanatty túrde ashqan bolatyn. Ashylý rásiminde Prezıdent jetekshi ýnıversıtetti «Jańa Qazaqstan ǵylymy men biliminiń altyn dińgegi» - dep baǵalaǵan edi.
QazUÝ-dyń hımııa fakýlteti 2010 jyly «QazUÝ-dyń Úzdik fakýlteti» baıqaýynda jeńimpaz atandy. Sondaı-aq, nanotehnologııa salasy boıynsha búginge deıin ótkizilgen 14 respýblıkalyq baıqaýdyń 7-nde QazUÝ-dyń hımık-ǵalymdary jeńiske jetken.
Ýnıversıtet rektory Baqytjan Tursynuly ashylý saltanatynda barsha QazUÝ-lyqtardy mereıli sharasymen quttyqtady. «Bıyl talapkerlerdi qabyldaý naýqanynda QazUÝ 3200 memlekettik bilim grantyn ıelenip, qazaqstandyq joǵary oqý oryndary arasynda rekordtyq nátıje kórsetti. Al hımııa fakýlteti oqýǵa 405 bilimgerdi memlekettik bilim granty negizinde qabyldady. Onyń 36-sy «Altyn belgi» ıegeri. Bir aıtarlyǵy, bul fakýltet keıbir mamandyqtar boıynsha jalpy memlekettik tapsyrystyń 50 paıyzyna ıe. Elimizdiń jetekshi ýnıversıtetiniń endigi baǵyndyrmaq belesi - qazaqstandyq joǵary oqý oryndary arasynda birinshi bolyp álemdik úzdik reıtıngke ený», dedi rektor.
Hımııa fakýltetiniń stýdentteri 2010-2011 oqý jylyn endi sońǵy úlgidegi tehnologııalarmen jabdyqtalǵan jańa oqý ǵımaratynda bastaıdy. Bes qabatty ǵımaratta zamanaýı zerthanalar men oqý dálizderi bar.
Saltanatty tusaýkeser rásimi QazUÝ-dyń hımııa fakýltetiniń shaǵyn zalynda ótti. Tusaýkeserde qonaqtarǵa jetekshi ǵylymı kafedralardyń jetistikteri men hımııa salasyndaǵy ǵalymdardyń úzdik ǵylymı kórsetkishteri baıandaldy.
