Almatyda ál-Farabı atyndaǵy QazUÝ-da Túlekter kúni toılanyp jatyr
ALMATY. QazAqparat - Almatyda ál-Farabı atyndaǵy Qazaq ulttyq ýnıversıtetiniń Túlekter kúni toılanyp jatyr. QR Táýelsizdiginiń 25 jyldyǵy men Almatynyń 1 000 jyldyǵyna arnalǵan bul saltanatty sharaǵa ýnıversıtetti ár jyldary támamdaǵan júzdegen túlekter qatysty.
Mereke stýdenttik kampýs aýmaǵynd QazUÝ stýdentteri men túlekteriniń «Máńgilik el» trıýmfaldy qaqpasynyń alǵashqy irge tasyn jáne Jas urpaqqa úndeý mátini salynǵan kapsýlany saltanatty túrde qalaýmen ári Kurmetti metsenattar taqtasynyń tusaýkeser rásimimen bastaldy.
Budan keıin, ýnıversıtet rektory Ǵalymqaıyr Mutanov, QR Joǵarǵy sotynyń tóraǵasy Qaırat Mámı, Qazaqstan Respýblıkasyndaǵy Bala quqyqtary jónindegi ýákil Zaǵıpa Balıeva bastaǵan túlekter, Shyǵystyń uly oıshyly Ábý-Nasyr ál-Farabı eskertkishi men akademık Ó.Joldasbekov monýmentine gúl shoqtaryn qoıdy.
Budan soń, Ó. Joldasbekov atyndaǵy stýdentter saraıynda saltanatty jıyn ótti.
Óziniń quttyqtaý sózinde QazUÝ rektory, tehnıka ǵylymdarynyń doktory Ǵalymqaıyr Mutanov búgingi jınalǵan qaýymdy Túlekter kúnimen jáne QazUÝ Túlekter qaýymdastyǵynyń qurylǵanyna 15 jyl tolýymen quttyqtap, birqatar oılaryn ortaǵa saldy.
«Ár joǵary oqý ornynyń atqaryp jatqan jumysynyń aıqyn kórsetkishi - ol túlekteri. Túlekteriniń jetken jetistikteri. Sol turǵydan alyp qaraǵanda, bizdiń ýnıversıtet óz túlekterimen maqtana alady. Olar ózderiniń jetken jetistikterimen ýnıversıtetimizdi ǵana emes, búkil elimizdi álemge tanytyp júr. Adam ómirindegi eń qyzyqty kezeń, ol árıne stýdenttik shaq. Búgin minekı, Túlekter kúni aıasynda bir-birimizben qaıta qaýyshyp otyrmyz. Degenmen, búgingi kezdesýdiń máni tek júzdesý ǵana emes. Aldymyzda turǵan keleli máselelerdi sheship, bolashaqqa jospar qurýda sizderdiń syndarly pikirlerińiz bizge óte qajet. Bıyl qatarlaryńyz 5 myńǵa tarta jańa túlektermen tolyqty. Musylman tilimen aıtqanda ýnıversıtettiń ýmmasy jasalyp jatyr. Biz ózimizdi aldaǵy ýaqytta QazUÝ-dyń úmbetterimiz dep sanaýymyz kerek», - dedi Ǵ. Mutanov.
Shara barysynda Ǵalymqaıyr Mutanuly QazUÝ geologııa-topyraqtaný fakýltetiniń 1954 jylǵy túlegi, ár jyldary mádenıet bóliminiń bastyǵy, aýdandyq bilim berý bóliminiń meńgerýshisi, mektep dırektory, Almaty oblysynda aýyldyq keńestiń tóraǵasy bolyp qyzmet atqarǵan Nurádil Qalımoldaevty, QazUÝ-dyń 1971 jylǵy túlegi, belgili dramatýrg, jazýshy Sultanáli Balǵabaevty, QazUÝ-dyń 1976 jylǵy túlegi, Abaı atyndaǵy Qazaq ulttyq pedagogıkalyq ýnıversıtetiniń rektory Serik Pirálıevti, QazUÝ-dyń 1986 jylǵy túlegi, Qazaq memlekettik qyzdar pedagogıkalyq ýnıversıtetiniń rektory Dınar Núketaevany, QazUÝ-dyń 1981 jylǵy túlegi, «Shyǵys ken» óndirisiniń bas dırektory Zelına Katranovany, QazUÝ-dyń 1981 jylǵy túlegi, Almaty qalalyq advokattar alqasynyń advokaty Baýyrjan Rahymovty, QazUÝ-dyń 1996 jylǵy túlegi, Qazaqstan qarjygerleri qaýymdastyǵy keńesiniń tóraǵasy Maǵjan Áýezovty, QazUÝ-dyń 1996 jylǵy túlegi, Qazaqstannyń Katar memleketindegi Tóteshe jáne ókiletti elshisi Asqar Shoqybaevty «ál-Farabı atyndaǵy QazUÝ-ǵa 80 jyl» mereıtoılyq medalimen saltanatty jaǵdaıda marapattady.
Túlekter toıy odan ári jalǵasýda.
