Almatyda aqyn Mustaı Kárim atyndaǵy kóshe ashyldy
ALMATY. QazAqparat - Almatyda bashqurtstandyq aqyn Mustaı Kárimniń qurmetine arnalǵan kóshe ashyldy, dep habarlaıdy QazAqpart tilshisi.
Mamyr - 4 yqsham aýdanydaǵy burynǵy Sadovaıa kóshesi, bıyl 100 jasqa tolǵan uly aqyn Mustaı Kárimniń esimimen ataldy.
Ashylý saltanatynda Almaty qalasynyń ákimi Baqytjan Saǵyntaev, QR Sport jáne mádenıet mınıstri Aqtoty Raıymqulova, bashqurt eliniń aqyny, jazýshy, dramatýrg M.Kárimovtiń nemeresi Temirbolat Kárimov quttyqtaý sóz sóıledi.
«Endi Mustaı Kárimniń aty bizdiń elimizdiń mádenıet tarıhynda máńgilikke jazyldy. Bul baýyrlas Bashqurt halqynyń jarqyn ókiliniń baı shyǵarmashylyq murasyna, joǵary ádebı sheberligine degen qurmet. Mustaı Kárim - uly aqyn, jazýshy, jýrnalıst, kórnekti qoǵam qaıratkeri. Ol álemdik ádebıetke úlken úles qosty. Onyń shyǵarmashylyǵy tek qana Bashqurt halqynyń ǵana emes, búkil túrki áleminiń rýhanı murasy bolyp tabylady jáne kitaptary álemniń ondaǵan tiline aýdarylǵan. Almatydaǵy búgingi is-shara Qazaqstan men Reseı, Bashqurtstan jáne Almaty arasyndaǵy mádenıetaralyq qatynastardyń damýyna úlken serpin beretinine senimdimin. Osy mańyzdy sharamen bárińizdi quttyqtaımyn», - dedi Almaty qalasynyń ákimi Baqytjan Saǵyntaev.
Jazýshynyń nemeresi, «Mustafa Kárim» qorynyń negizin qalaýshy Temirbolat Kárimov bıylǵy jyl onyń otbasy úshin erekshe ekenin atap ótti.
«Mustaı Kárim Qazaqstandy jaqsy kórdi. Ol Almatyǵa kelgendi unatatyn. Sebebi, onyń kóptegen dostary, jazýshy, aqyndar osy qalada turdy. Olardy baýyrlastyq qarym-qatynastarmen, oqyrmandarǵa degen úlken jaýapkershilik baılanystyrdy. Talant azdyq etedi. Aqynyń júregi taza, oqyrmanǵa degen yqalasy zor bolýy qajet. Mustaı Kárim bul qasıetterdi Muhtar Áýezovten úırendi. Qazaqtyń zańǵar jazýshysymen ol Máskeýde kezdesti, sondaı-aq Sábıt Muqanov, Ǵabıt Músirepov pen onyń maıdandas dosy Ábý Sársenbaevtan sabaq aldy», - dedi ol.
Onyń poezııasy, prozasy, dramatýrgııasy qazaq tiline aýdaryldy. Bul ıgi ispen qazaqstandyq dostary Juban Moldaǵalıev, Sherhan Murtaza aınalysty. Búginde Mustaı Kárimniń shyǵarmasy qazaq oqyrmandarynyń júreginen oryn aldy.
«Ol qazaq halqynyń tazalyǵy men keńdigine tánti bolatyn. Onyń qazaqstandyq oqyrmandarǵa alǵysy sheksiz edi. Sábıt Dosanov, Mustaı Kárim qaıtys bolǵannan keıin kóp uzamaı, ol týraly: «Ulylar qaıtyp kelý úshin ketedi» degen maqala jazdy. Búgin aqynnyń jany bizben birge. Ol árdaıym ásem, ádemi qalaǵa oralýdy armandady. Sizderge úlken rahmet, - dedi Temirbolat Kárimov.
Aıta keteıik, is-sharaǵa QR-nyń RF Tótenshe jáne Ókiletti Elshisi Imanǵalı Tasmaǵambetov, sondaı-aq Qazaqstan men Reseıdiń aqyn-jazýshylary, etnomádenı birlestikter men jastar uıymdarynyń ókilderi qatysty.
