Almatyda aqyn Keńshilik Myrzabekov turǵan úıge eskertkish taqta ornatyldy
ALMATY. QazAqparat - Almaty qalasynyń «Kóktem» shaǵyn aýdanynda qazaqtyń kórnekti aqyny Keńshilik Myrzabekov (1946-1989) turǵan úıge eskertkish taqta ornatyldy. Bul týraly áleýmettik jelide aqyn, jýrnalıst, jýyrda «Qazaq ádebıeti» gazetiniń bas redaktory bolyp taǵaıyndalǵan Janarbek Áshimjan málim etti, dep habarlaıdy «QazAqparat» tilshisi.
«Keńshilik ǵajaıyp shyǵarmalaryn osy úıde jazdy. Aqynnyń dúnıeden ótkenine 28 jyl bolypty. Osy jyldar ishinde Qazaqstan Jazýshylar odaǵy áldeneshe ret taqta ornatý máselesin Almaty qalasyndaǵy taqta otyryp ketken aqjaǵalylarǵa aýyzsha da, jazbasha da eskertken. Ártúrli kedergiler boldy, abyroı bolǵanda, qala ákimi Baýyrjan Baıbek myrzanyń tikeleı pármenimen júzege asty. Soǵystan keıin týǵan býyn ókilderi, belgili aqyn-jazýshylardyń bári keldi. Aqynnyń tuıaǵy, izdeýshisi, ádebı murasyna ıe bolyp kele jatqan belgili ádebıet synshysy Amangeldi Keńshilikulyna Alla razy bolsyn! Árqaısysymyzdyń perzentimiz osyndaı-aq bolsyn. Jıyndy qalalyq til basqarmasynyń basshysy Mamaı Axet tamasha basqardy. Bir-birimizdi tiri kezimizde ardaqtap júreıik, aǵaıyn... Ýaqyt bolǵanda ár tóbede qalamyz», dep jazdy Janarbek Áshimjan.
Aıta keteıik, Keńshilik Aǵytaıuly Myrzabekov Qostanaı oblysy Jangeldın aýdany Jánibek Tarhan aýylynda dúnıege kelgen. QazMÝ-dyń jýrnalıstıka fakýltetin bitirgen (1976). 1966-1989 jyldary Qostanaı oblysy «Kommýnızm tańy» (qazirgi «Qostanaı tańy»), «Lenınshil Jas» (qazirgi «Jas Alash»), Almaty oblysy «Jetisý», «Sotsıalıstik Qazaqstan» (qazirgi «Egemen Qazaqstan») gazetterinde, «Jazýshy» baspasynda, «Mádenıet jáne turmys» (qazirgi «Parasat») jýrnalynda qyzmet atqardy. Aqynnyń alǵashqy jınaǵy «Іńkár dúnıe» 1972 jyly baspadan shyqty.
Onyń «Sárýar» (1980), «Revolıýtsııa perzentteri» (1980), «Qasıetti qas-qaǵym» (1985), «Dáýir - dastan» (1988), «Aýyl men astana» (1994) atty óleńder jınaǵy jaryq kórgen. «Balalyq shaq balladalary» atty jyr jınaǵy zertteýshiler tarapynan joǵary baǵalandy (1987). Ol E.Evtýshenkonyń «Meniń sheshem jáne neıtron bombasy», «Fýký» atty poemalaryn qazaq tiline aýdardy (1989). Sondaı-aq aqynnyń «Іńkár dúnıe» (1990), «Bir mysqal» (1996), «Jolǵa saldym kóshimdi» (2002), «Meniń muńym - mahabbat» (2003) atty jyr jınaqtary men «Tyń týraly tolǵaý» (1987) sekildi maqalalar, ocherkter jınaǵy bar. Myrzabekov jaıynda «Qaıran Keńshilik!» atty estelik kitap jaryqqa shyqty (1996).
2006 jyly Almaty qalasynda Keńshilik Myrzabekovtyń qurmetine kósheniń aty berilgen.
