Almatyda aqyn Israıl Saparbaıdyń ádebı-mýzykalyq shyǵarmashylyq keshi ótedi
ASTANA. QazAqparat - 24 mamyrda Almatyda Jambyl atyndaǵy Qazaq memlekettik fılarmonııasynyń kontsert zalynda aqyn-sazger, dramatýrg, Táýelsiz «Platınaly Tarlan» syılyǵynyń laýreaty, «Parasat» ordeniniń ıegeri Israıl Saparbaıdyń «Seniń týǵan kúnińde» atty ádebı-mýzykalyq (poezııa, án, bı) shyǵarmashylyq keshi óted, dep habarlady keshti uıymdastyrýshylar.
Keshke tanymal estrada juldyzdarymen qosa talantty jas ánshiler jáne T.Júrgenov atyndaǵy óner akademııasynyń stýdentteri qatysady.
Kúndelikti ótkizilip júrgen mashyqty, stereotıptik sıpattaǵy kontsertterden atalmysh keshtiń basty aıyrmashylyǵy men ózgesheligi - úlken-úlken úsh birdeı óner salasynyń, ıaǵnı Poezııa, Án, Bıdiń bir-birimen kirigip, birigip tutastaı shyǵarmashylyq keshke aınalýy. Árıne, bul avtor úshin de, qoıylym rejısseri úshin de úlken eńbekti, yjdaǵatty izdenisti talap etedi.
Aıta ketý kerek, ótken jyldyń 5-6 mamyry kúnderi M.Áýezov atyndaǵy Memlekettik akademııalyq drama teatrynda I.Saparbaıdyń «Mahabbat maýsymy» atty ádebı-mýzykalyq óner keshi ótken bolatyn. Kesh kórermen-tyńdarman qaýymy tarapynan úlken qyzyǵýshylyq týǵyzyp, jaqsy jańalyq turǵysynda baǵalandy. «Qazaqstan» ulttyq telearnasy bul keshti tolyqtaı túsirip, birneshe ret kórermen nazaryna usynǵan bolatyn.
Joǵaryda aıtqandaı, bıylǵy ótkizilgeli otyrǵan kezekti kesh te rejısser men aqynnyń shynaıy dostyǵy men birneshe jylǵy shyǵarmashylyq birliginiń ıgilikti jemisi. Anyǵyraq aıtqanda, ári ustaz, ári rejısser Murat Ábzelbaev, názik lırıkalyq aqyn - «mahabbat shaıyry» Israıl Saparbaı ózderiniń óner órisindegi kópjyldyq tájirbıeleri men qarym-qabiletterin bir arnaǵa biriktirip, kópshilik ıgiligine usynyp otyr. Bul - izdeımin, tabamyn degen kisige óner kókjıeginiń sheksizdigin ańǵartsa kerek.
