Almatyda aqyly avtoturaqtar qalanyń menshigine qaıtaryldy
«Almaty ákimdigi qoldanystaǵy zańnamaǵa sáıkes joǵaryda kórsetilgen kompanııalardaǵy úlesterdi qaıtarý týraly tıisti qaýly qabyldady. Búginde aqyly turaq júıesi shtattyq rejımde jumys isteıdi. Qaýlyǵa sáıkes, aqyly turaqtar qyzmetinen túsken búkil kiris aǵymdaǵy jyldyń 25 sáýirinen bastap qala bıýdjetine baǵyttalady»,-dep habarlady qalalyq ákimdikten.
Qazirgi ýaqytta Almaty ákimdigi qalanyń turaq aımaǵyn uıymdastyrý jóninde biryńǵaı operator qurý boıynsha jumysty bastady.
Qoldanystaǵy zańnamada belgilengen ruqsat berý qujattaryn alý merzimin, sondaı-aq monopolııaǵa qarsy organdarmen kelisý qajettiligin eskere otyryp, biryńǵaı operator 2022 jylǵy 1 tamyzǵa deıin qurylady.
«Almaty turǵyndarynyń shaǵymdary negizinde servıs sapasyn arttyrý maqsatynda aqyly turaqtar jumysyn jetildirý úshin keshendi sharalar qabyldanady. Aldaǵy ýaqytta halyqaralyq tájirıbeni qoldana otyryp, qalalyq turaq keńistigin damytý jáne kósheler men aýlalardy abattandyrý úshin aqyly turaqtardan túsetin túsimderdi paıdalaný tujyrymdamasyn ázirleý josparlanýda. Sondaı-aq, jınaqtalǵan problemalardy sheshý úshin qalada kóp deńgeıli turaqtar salý basymdyqqa ıe bolady».- dep atap ótti qalalyq ákimdiginiń baspasóz qyzmeti.
Aıta keteıik, «Alan Parking» JShS dırektory Muhtar Bazarbaev eki aıǵa qamaýǵa alynǵan bolatyn.
Sonymen qatar, «Almaty spetstehparkıng servıs» JShS dırektory Marat Prınbekov ta qamaýda otyr.
Qazirgi ýaqytta kompanııa basshylaryna qatysty qylmystyq is qozǵaldy jáne bıýdjet qarajatyn urlaýmen baılanysty tergeý amaldary júrip jatyr.
Almatyda aqyly avtoturaq júıesi alǵash ret 2016 jyly engizildi.
Joǵaryda atalǵan kompanııalardyń aqparaty boıynsha, aqyly turaqtardan qarjy aınalymy jylyna orta eseppen 1,4 mlrd teńge boldy.
