Almatyda aqyly avtoturaqtar boıynsha zańsyz qyzmet kórsetkender jaýapkershilikke tartyldy
ALMATY. QazAqparat - Almatyda aqyly avtoturaqtar boıynsha zańsyz qyzmet kórsetý áreketteri jalǵasýda. Bul týraly búgin Almaty ákiminiń baspasóz qyzmetinen habarlady.
Qalada kólik qoıatyn oryndardyń ınfraqurylymyn damytý boıynsha josparlanǵan sharalardy júzege asyrý, sondaı-aq jol qozǵalysyna qatysýshylardyń mádenıetin arttyrý maqsatynda qalalyq Іshki ister departamenti zańsyz avtoturaqtardy anyqtaý boıynsha maqsatty sharalardy júzege asyryp jatyr.
Búgingi tańda «Almaty tehspetsparkıng servıs» JShS 69 tegin avtoturaqty belgilegen bolatyn. Alaıda, ústimizdegi jyldyń 1-shi qarashasy men 19-shy jeltoqsany aralyǵynda «Tastaq», «Baısat», «Aıagóz», «Bolashaq», «Alataý», «Qulager», «Barys», «Saryarqa» bazarlarynyń mańyna, sondaı-aq Abylaı han dańǵyly boıyna jasalǵan reıdtik sharalar barysynda 68 stıhııalyq avtoturaq anyqtaldy.
Reıd barysynda avtokólikterdi zańsyz ornalastyrýmen aınalysqan 328 adam ishki ister organdaryna jetkizilip, 293-i ákimshilik jaýapkershilikke tartyldy. Olardyń ishinde 240 adam - azamattarǵa orynsyz jabysyp mazalaryn alǵan, 53 adam qalany abattandyrý erejesin buzǵan. Quqyq buzýshylarǵa jalpy somasy 1 mln. 962 myń teńge aıyppul salyndy.
Odan basqa, aýdandyq ákimdikterdiń qatysýymen avtokólikterge oryn taýyp berýmen aınalysatyn jáne kólikterdi túnde kúzetetin azamattarǵa arnalǵan 8 qurylym buzyldy.
Sondaı-aq Almaly, Áýezov, Bostandyq jáne Jetisý aýdandarynda zańsyz avtoturaqtar jabyldy.
Jol-patrýldik polıtsııa qyzmetkerleri osy atalǵan merzim ishinde avtokólikti toqtatý jáne avtoturaqqa qoıý boıynsha 1 135 ret jol qozǵalysy erejesiniń buzylǵandyǵyn anyqtady.
Olardyń ishinde kólikti jol júretin jerde toqtatý jáne turaqqa qoıý erejesi 899 ret buzylsa, 236 ret avtokólik jaıaý júrginshi jolyna qoıylǵan.
