Almatyda «aqyldy aıaldama» paıda bolady
ALMATY. QazAqparat - Almatyda «aqyldy aıaldama» paıda bolady. Ótken aptada Almaty ákimi Baýyrjan Baıbekke «Aqyldy qala» jobasy tanystyryldy.
Áleýmettik-ınnovatsııalyq jobanyń tujyrymdamasy qaýipsizdik, qala ınfraqurylymy, bilim jáne áleýmettik qyzmetter syndy 4 negizgi prıntsıpten turady.
«Aqyldy qala» jobasyn jasaýshy avtorlar syrtqy kelbetti, nómirlik belgilerdi, kıim túrin jáne basqalaryn jedel anyqtaıtyn vıdeo-kontentti saralaı kelip, jobanyń negizine «Qaýipsiz qala» júıesin alǵan. Jańa júıeniń arqasynda kez kelgen ýaqytta onlaın-rejimde aqparat quzyrly organdarǵa qoljetimdi bolady.
Sonyń arqasynda jedel basqarý ortalyǵyna habar tez jetedi. Baǵdarlamalyq qamtamasyz etý vıdeokameralar arqyly júzege asady. Búgingi kúni noý-haý tek Astanada, Rıoda, Máskeýde ǵana emes, álemniń basqa megapolısterinde de jumys isteýde.
Sondaı-aq, «Interaktıvti qala» jobasy aıasynda «Aqyldy aıaldama» paıda bolady. Munda ınteraktıvti taqtalar antıvandaldy qorǵanyshtar arqyly jumys isteıdi.
Jolaýshylar arnaıy taqtadan avtobýs baǵyttaryn bilip otyrady. Aıaldamada ornalasqan «Interaktıvti kıoskiler» arqyly túrli tólemderdi tóleýge bolady. «Dabyldy núkte» arqyly bank, meıramhana qyzmetkerleri óz jumystaryn qaýipsizdendire alady.
Joba avtorlary atalǵan jobalardyń júzege asýy úshin ınvestorlardy tartýǵa bar kúshin salatynyn aıtyp sendirdi.
Shara sońynda ákim kásiptik vedomstvolar basshylaryna qalada osy jobany engizýdiń qanshalyqty paıdaly ekendigin jete zertteýdi tapsyrdy.
