Almatyda AQTQ-nyń taralý jaǵdaıy kún tártibindegi ózekti másele bolyp qala bermek - T. Bapıev
ALMATY. 21 shilde. QazAqparat /Ádilet Musahaev/ - Sońǵy jarty jylda JQTB ortalyǵynda AQTQ-ǵa jáne taǵy basqa ınfektsııaǵa qarsy testten 107 myń almatylyq ótti. Bul ótken jylǵy osy ýaqytpen salystyrǵanda 6 paıyzǵa kóp.
Bul jaıynda Almaty qalasy JQTB ortalyǵynyń bas dárigeri Talǵat Bapıev búgin JQTB men kúres sheńberinde júrgizilgen birinshi toqsandaǵy sharalardy qorytyndylaý kezinde aıtty.
Bul test túri atalǵan ortalyqta tegin júrgiziledi. Oǵan testke deıingi keńes, bir ret paıdalanýǵa jaramdy quralmen qan alý kiredi. Eger buryn AQTQ nátıjesin alý úshin eki apta kútý kerek bolsa, qazir sol kúni-aq alýǵa bolady eken.
Sondaı-aq jıyn barysynda qalalyq JQTB ortalyǵy sońǵy jarty jylda atqarylǵan is-sharanyń qorytyndysyn jasap, eń úzdik bilim ordasyn, oqýshylar men belsendilerdi marapattady.
Atalǵan sharada JQTB ortalyǵynyń bas dárigeri Talǵat Bapıev osy sharada belsendilik tanytqandary úshin jastarǵa alǵysyn bildirdi. «Qazirgi kúni ár adam óziniń jáne jaqyn týystarynyń densaýlyǵyna mán berip, kútýleri kerek. AQTQ-ǵa jáne taǵy basqa ınfektsııaǵa qarsy testten ótý adamnyń óz densaýlyǵyna degen úlken jaýapkershilikti kórsetedi», -dep atap ótti medıtsına ǵylymdarynyń kandıdaty T.Bapıev.
Qalalyq JQTB ortalyǵy atalǵan indetterdiń aldyn alý maqsatynda eriktilermen, halyqaralyq jáne ÚEU-men tyǵyz baılanys ornata otyryp jumys isteýde.
AQTQ-ǵa qarsy testten ótý bizdiń elde erikti túrde júrgiziledi. Tek donorlar úshin ǵana mindetti sanalady. Júkti áıelder AQTQ-ǵa qarsy eki ret tekseristen ótedi.
Qazirgi kúni Almatydaǵy AQTQ-nyń taralýy kún tártibindegi ózekti másele bolyp qala bermek. 1-maýsym kúni qalalyq JQTB ortalyǵynda AQTQ-ǵa shaldyqqan 3368 adam tirkelgen, onyń 2379 qala turǵyndary bolsa, qalǵan 989-y basqa elderden kelýshiler. Aýrýdyń qan arqyly taraý túri burynǵydaı kósh bastap tur.
