Almatyda aqsha jymqyrǵan tehnıkalyq qadaǵalaý mamandary sottaldy
Almatylyq prokýrorlar «Áıgerim-1,2» shaǵyn aýdandarynyń sýmen jabdyqtaý jáne káriz jelileriniń qurylysyn, sondaı-aq «Han Táńiri» turǵyn úı keshenine arnalǵan sýqubyr jelileri men qurylystaryn qaıta jańartý jumystaryn zerttedi.
«Bul jumystardy Energetıka basqarmasynyń tapsyrysy boıynsha «K» JShS men «J» JShS 2018 jyldyń qańtar aıynda 760 mln teńgege oryndaýǵa tıis bolatyn. Sondaı-aq qurylys-montajdaý jumystarynyń sapaly oryndalýyn baqylaý eki adamǵa júktelgen. Prokýrorlar qajetti ólsheýlerdi júrgize otyryp, quny 225,5 mln teńge bolatyn jumystardyń oryndalmaǵanyn, aqshanyń urlanǵanyn, al nysandardyń jumys istemeıtinin anyqtady», - dep habarlady Almaty qalasynyń prokýratýrasy.
Atap aıtqanda, qarastyrylǵan eki rezervýardyń ornyna bireýi salynǵan, ýchaskeniń aýmaǵy abattandyrylmaǵan, arnaıy sorǵylar bolmaǵan.
Osyǵan qaramastan nysandar paıdalanýǵa berilip, shart boıynsha aqshalaı qarajat tolyq kólemde tólengen.
Bul tehnıkalyq qadaǵalaý mamandarynyń kómegimen júzege asqan. Nátıjesinde 10 adam, sonyń ishinde atalǵan mamandar, qurylys kompanııalarynyń basshylary jáne Energetıka basqarmasynyń birqatar laýazymdy tulǵasy sotqa tartyldy.
Memleketke keltirilgen jalpy shyǵyn - 225,5 mln teńge.
Prokýrorlyq tekserý nátıjeleri boıynsha qylmystyq is qozǵalyp, ony tergeýmen Almaty qalasynyń arnaıy prokýrorlary aınalysty.
«Sot úkimimen tehnıkalyq qadaǵalaýdyń 2 ókili jáne qylmysqa qatysy bar joǵaryda atalǵan 8 adam 7 jyldan 8 jylǵa deıingi merzimge bas bostandyǵynan aıyryldy. Sot protsesi barysynda sottalýshylar memleket kirisine 93,4 mln teńge tóledi, zalaldyń qalǵan somasy úkimdi oryndaý aıasynda óndirip alýǵa jatady»,- delingen habarlamada.
Jalpy daǵdarysqa qarsy sharalardy iske asyrý aıasynda bólingen bıýdjet qarajatyn jumsaý zańdylyǵyn tekserý 1 mlrd teńgeden astam somanyń jymqyrylǵanyn anyqtady, 18 is qozǵaldy, 4-ýi boıynsha úkim shyǵaryldy, qalǵandary sotta qaralyp jatyr.