Almatyda aqsha tasymaldaýshylarǵa shabýyl jasaǵandar mekteptiń beıne kamerasyna túsip qalǵan - QR ІІM
ASTANA. 30 qyrkúıek. QazAqparat - Almatyda aqsha tasymaldaýshy kúzetshilerge shabýyl jasap, adam óltirdi degen faktimen izdestirilip jatqan kúdiktiler qaladaǵy mektepterdiń birindegi beıne kameraǵa túsip qaldy.
Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda QR Іshki ister mınıstriniń orynbasary Erlan Turǵumbaev málim etti.
Budan buryn, 26 qyrkúıekte Almatyda Jeltoqsan jáne Q. Sátbaev kósheleriniń qıylysynda belgisiz bireýler aqsha tonaý maqsatynda ınkassatorlarǵa shabýyl jasap, onyń saldarynan ınkassatorlardyń biri oqıǵa ornynda mert bolǵandyǵy, ekinshisiniń hali múshkil ekendigi habarlanǵan edi.
Vıtse-mınıstrdiń aıtýynsha, kúzetshilerge shabýyl jasaǵan qarýly qaskúnemder ekeý bolǵan. «Olar júrip ótken joldyń boıynda mektepterdiń biriniń beıne kamerasyna túsip qaldy. Búginde kúdiktilerdiń beınesi bizde bar. Endi olardy anyqtaý jumystary júrip jatyr»,-dedi E. Turǵumbaev.
Sonymen qatar vıtse-mınıstr bul oqıǵa saldarynan zardap shekken men opat bolǵan azamat ınkassator emes ekendigin atap ótti.
