Almatyda aqsha aıyrbastaý pýnktine 80 myń dollar ótkizgen qyz aqshasynan aırylyp qaldy
Almaty qalalyq Polıtsııa departamentiniń málimetinshe, alaıaq Almatyǵa Semeıden kelgen. Ol aqsha aıyrbastaý ornyn jalǵa alyp, valıýta aıyrbastaý týraly habarlandyrý jarııalaǵan.
«Onyń quryǵyna birinshi bolyp Almaty turǵyny túsken. Jeksenbide kezdesetini týraly kelisken. Keıin boıjetken belgilengen orynǵa kelip, onyń qolyna 80 myń dollardy ustatqan. Er adam aıyrbastaımyn degen syltaýmen basqa bólmege ketip, qosalqy esikten qashyp ketken», - deıdi Almaty Polıtsııa departamenti bastyǵynyń tergeý jumysy jónindegi orynbasary Rýstam Ábdirahmanov.
Polıtsııa ókiliniń sózinshe, 1985 jyly týǵan kúdikti Óskemen áýejaıynda ustalyp, qamaýǵa alyndy.
«Sotaldy tergep-tekserýdi júrgizý Medeý aýdandyq polıtsııa basqarmasynyń tergeýshilerine tapsyryldy»,- dedi Rýstam Ábdirahmanov.